Bıyl qansha adamǵa elektrondy bilezik taǵyldy
ASTANA. KAZINFORM – Joǵarǵy Sot elektrondyq bilezikterdi qoldanýdy keńeıtti. Statıstıka boıynsha Qazaqstanda jyl saıyn 11 myńǵa jýyq adam sotqa deıin qamaýǵa alynady.
Tergeý organdarynyń aýyr jáne asa aýyr qylmystar boıynsha kúdiktilerdi qamaýda ustaýǵa sanktsııa berý týraly ótinishteriniń sany 30 paıyzǵa ósti. Bul jaǵdaı tergeýge qamaýǵa alynǵan adamdardy azaıtýǵa jáne balamaly bultartpaý sharalaryn keńeıtýge qatysty Qazaqstan qabyldaǵan baǵytqa jaýap bermeıdi.
Kúdiktini nemese aıyptalýshyny baqylaýdyń tıimdi ádisteriniń biri – búkil álemde keńinen qoldanylatyn elektrondy baqylaý júıesi (elektrondy bilezikter). Bul kúdiktiniń tergeý men sottan jasyrynyp, qylmystyq árekettermen aınalysýyn jalǵastyrady degen alańdaýshylyqty boldyrmaýǵa múmkindik beredi.
Bul qylmystyq qýdalaý orbıtasyna qatysatyn adamdar úshin salystyrmaly túrde arzan jáne tıimdi nusqa. Tergeletinderge elektrondyq monıtorıng júıelerin qoldaný jáne olarǵa qyzmet kórsetý memleket úshin olardy tergeý ızolıatorynda ustaýǵa qaraǵanda arzanyraq. Sonymen qatar bul adamdar ómir saltyn saqtap, áleýmettik baılanystardy qoldaı otyryp, jumysyn jalǵastyra alady.
Bıyl sáýirde Joǵarǵy Sottyń bastamasymen ótkizilgen vedomstvoaralyq keńesten keıin elordada pılottyq joba bastaldy. Onyń aıasynda elektrondy baqylaýdy qoldaný keńeıdi. Osy kezeńde tergeý soty tergeý organdaryna 26 kúdiktini qamaýǵa alýdan bas tartty. Onyń ornyna, olarǵa qatysty bultartpaý sharasy – elektrondy bilezikter taǵýmen úı qamaǵyna alý tańdaldy.
Elektrondyq baqylaý quraldaryn qoldanýdyń negizgi úlesi Sybaılas jemqorlyqqa qarsy qyzmet tergep-tekseretin ister boıynsha – 14 (Polıtsııa departamenti - 10, Ekonomıkalyq tergeý departamenti-2). Bul rette, QK-niń 106-babynyń 1-bólimi, 190-baptyń 1,3-bólimderi, 296-baptyń 4-bólimi, 297-baptyń 3-bólimi, 299-1-baptyń 1,2-bólimi boıynsha polıtsııa organdarymen tergelip jatqan ister boıynsha elektrondy quraldar qoldanyldy.
Bilezikterdi qoldaný algorıtmi jasaldy. Joǵarǵy Sot elordalyq sottyń oń tájirıbesin respýblıkalyq deńgeıde taratýdy josparlap otyr. Bul qamaýǵa alynǵandar sanyn azaıtady.
Qabyldanyp jatqan sharalar el Prezıdentiniń qylmystyq protseste jeke tulǵanyń konstıtýtsııalyq quqyqtary men bostandyqtaryn qamtamasyz etý týraly tapsyrmalaryna tolyq sáıkes keledi.
