Bıyl qandaı iri joldar qoldanysqa beriledi – Úkimet
ASTANA. KAZINFORM – QR Premer-Mınıstri Oljas Bektenov jol jóndeý qarajatyn ıgerý qarqyny tómen óńirlerdi atady.
«Prezıdent 2025 jyldyń sońyna qaraı respýblıkalyq joldardyń barlyǵyn normatıvtik jaǵdaıǵa keltirýdi tapsyrǵan edi. Qazir kúre joldardy kúrdeli jóndeý jáne jańǵyrtý jumystary júrýde. Bıyl birqatar iri jobalar – «Qaraǵandy – Almaty», «Aqtóbe – Qandyaǵash», «Atyraý – Astrahan» jáne «Taldyqorǵan – Óskemen» jobalary aıaqtalýǵa tıis. Sondaı-aq respýblıkanyń shamamen 2,5 myń shaqyrym jolynda jóndeý jumystary qolǵa alyndy», - dedi O. Bektenov Úkimet otyrysynda.
Onyń aıtýynsha, ózekti problemanyń biri – qarjylandyrý. Keıbir óńirlerde jalpy sıpattaǵy transfertterdi ıgerý qarqyny tómen. Mysaly, mundaı problemalar Aqtóbe, Túrkistan jáne Ulytaý oblystarynda bar.
«Taǵy bir másele – jobalardy iske asyrý merzimderiniń múltiksiz saqtalýy. Bul ásirese, soltústik jáne shyǵys óńirler úshin mańyzdy. Óıtkeni onda qurylys maýsymy qysqa. Sondyqtan qarqyndy tómendetpeý úshin qajetti sharalardyń barlyǵyn der kezinde qabyldaý kerek», - dedi Úkimet basshysy.
Búgingi tańda jańa avtojol jobalaryn bastaý úshin 550 ýchaskeni alý qajet. Olardyń ishinde «Qaraǵandy – Jezqazǵan», «Aqtóbe – Ulǵaısyn» jáne «Saryaǵash qalasynyń aınalma joly» bar.
«Osyǵan oraı óńir ákimdikterine 2030 jylǵa deıin josparlanǵan barlyq jańa avtojol qurylysy jobalarynyń boıyndaǵy jer ýchaskelerin alýdy jáne rezervke qoıýdy qamtamasyz etýdi tapsyramyn», - dedi Premer.
