Bıyl ınklıýzıvti jumyspen qamtý múmkindigi keńeıtiledi – Eńbek mınıstrligi
ASTANA. KAZINFORM – Elimizde 752 myń múgedektigi bar adam tirkelgen. Bul týraly Úkimet otyrysynda QR Eńbek jáne halyqty áleýmettik qorǵaý mınıstri Asqarbek Ertaev málim etti.
- Qazaqstan Respýblıkasynda 2030 jylǵa deıingi Inklıýzıvti saıasat tujyrymdamasy oryndalyp keledi. Kórý qabileti buzylǵan adamdardyń baspa aqparatyna qoljetkizýin jeńildetý jónindegi Marrakesh sharty ratıfıkatsııalandy. Jeke kómekshi qyzmetin kórsetý, Áleýmettik qyzmetter portaly arqyly ınvataksı qyzmetin usyný máselesi zańmen retteldi. Múgedektigi bar adamdardyń aqparatqa qoljetkizýin qamtamasyz etý normalary kúsheıtildi. Birinshi toqsan qorytyndysy boıynsha elektrondyq dúkender málimetin qoldana otyryp, tehnıkalyq ońaltý quraldarynyń qunyn óteýdiń kepildik berilgen somasyn aıqyndaý ádistemesi bekitildi. Jyl aıaǵyna deıin arnaýly áleýmettik qyzmetter kórsetý standarty sapasyn arttyrý jáne ınklıýzıvti jumyspen qamtý múmkindigin keńeıtý josparlanǵan, - dedi A.Ertaev.
Onyń aıtýynsha, búginde elimizde shamamen 752 myń múgedektigi bar adam turady. Bul jalpy halyq sanynyń 3,7 paıyzy. Onyń ishinde eńbekke qabiletti jastaǵy adamdar - 56%, zeınetkerler - 29%, balalar - 15%.
- Bıyl memlekettik bıýdjetten jáne Memlekettik áleýmettik saqtandyrý qorynan jıyntyq shyǵystar 1,1 trln teńge, - dedi mınıstr.
Budan buryn habarlanǵandaı, eńbek bırjasynda múgedektigi bar azamattarǵa 16,7 myń jumys orny usynyldy.
