Bıyl ınflıatsııa qarqyny baıaýlady – sarapshy Qazaqstan ekonomıkasynyń qorytyndysy týraly
Ótken jyly Qazaqstan ekonomıkasy energetıkalyq daǵdarys, kúrdeli geosaıası jaǵdaılar jáne jetkizý tizbegindegi irkilister syndy birqatar kúızeliske tap boldy. Nátıjesinde ınflıatsııanyń jyldyq ósýi 20%-dan asty. 2023 jyly Ulttyq bank birneshe sharal qabyldaýǵa májbúr boldy jáne olar nátıjesin berdi. Ekonomıka salasyndaǵy sarapshy Arman Baıǵanov Qazaqstan ekonomıkasyndaǵy jyldyń basty oqıǵalary týraly suhbat berdi, dep habarlaıdy Kazinform.
«Bıylǵy Qazaqstan ekonomıkasynyń basty jetistigi – ınflıatsııa qarqynynyń baıaýlaýy. Qazirgi ýaqytta ınflıatsııa deńgeıi 10,3% kórsetýde, al ótken jyly jyldyq ınflıatsııa deńgeıi 21,3%-ǵa jetken edi», - dedi ekonomıst Arman Baıǵanov.
Onyń aıtýynsha, taǵy bir mańyzdy oqıǵa – tsıfrlyq valıýtany engizý dep sanaýǵa bolady.
«Qazir tsıfrlandyrýdyń belsendi damýy júrip jatyr, bul aqsha qatynastaryna jaqsy áser etedi. Bıyl Ulttyq Bank tsıfrlyq valıýtany tanystyrdy. Erteli-kesh qazaqstandyqtarǵa tsıfrlyq valıýtany paıdalaný yńǵaıly bolady dep oılaımyn. Al bul sybaılas jemqorlyq pen kóleńkeli ekonomıka kórsetkishterin tómendetedi», - dep atap ótti sarapshy.
Jalpy, ekonomıkadaǵy jetistikterdi onyń ósý kórsetkishteri boıynsha baǵalaýǵa bolady.
«1 jeltoqsandaǵy jaǵdaı boıynsha ekonomıkanyń ósýi 4,9%-dy qurady. Ótken jyly bul kórsetkish 3%-dan az boldy. Bul rette jan basyna shaqqandaǵy JІÓ ortasha ósimi ótken jylmen salystyrǵanda 11%-ǵa joǵary», - dep atap ótti sarapshy.
Aıta keteıik, Halyqaralyq valıýta qory Qazaqstan ekonomıkasynyń 2023 jyly 4,3%-ǵa deıin ósýin boljaǵan bolatyn.
