Bıyl halyqtyń kómirge degen qajettiligi 1 mln tonnaǵa kemıdi
ASTANA. KAZINFORM – Aldaǵy jylytý maýsymynda halyqty kómirmen qamtamasyz etý úshin Respýblıkalyq shtab jumys isteıdi. Bul týraly búgin Úkimet otyrysynda Energetıka mınıstri Erlan Aqkenjenov aıtty.
- Halyqty kómirmen qamtamasyz etý maqsatynda mınıstrlik tarapynan barlyq múddeli taraptardyń qatysýymen Respýblıkalyq shtab jumys isteıdi. Jalpy alǵanda, aldaǵy jylytý maýsymyna halyq pen kommýnaldyq-turmystyq sektordyń kómirge degen qajettiligi 7,3 mln tonna bolady. Onyń ishinde kommýnaldyq-turmystyq sektor úshin – 1,6 mln tonna, halyq úshin – 5,7 mln tonna. Aıta ketý kerek, ótken jylytý maýsymynda kommýnaldyq-turmystyq sektor men halyqtyń kómirge naqty qajettiligi 8,3 mln tonna boldy. Bıyl kómirge qajettilik kóleminiń tómendeýi eldi 2035 jylǵa deıin gazdandyrýdyń bas shemasyn iske asyrýǵa baılanysty, - dedi mınıstr.
Onyń aıtýynsha, óńirlerdi qatty otynnyń qajetti kólemimen úzdiksiz qamtamasyz etý maqsatynda mınıstrlik jasandy ıntellekt jáne predıktıvtik taldaý elementteri engizilgen Biryńǵaı tsıfrlyq platforma ázirledi. Júıege 36 kómir óndirýshi kásiporynnyń derekteri, 29 myń jartylaı vagondy paıdalana otyryp júzege asyrylatyn temirjol tasymaldary, 586 kómir tuıyǵy operatorynyń qyzmeti jáne 1,2 mln astam tutynýshy týraly málimetter biriktirilgen.
Platforma naqty ýaqyt rejıminde kómirdiń óndirýden jáne jóneltýden bastap halyq pen kommýnaldyq-turmystyq sektorǵa jetkizilýine deıingi barlyq kezeńdegi qozǵalysyn baqylaýǵa múmkindik beredi. Sondaı-aq tapshylyq táýekelderi men bekitilgen kestelerden aýytqýlardy avtomatty túrde anyqtaıdy.
- Mınıstrlik ishki naryqty qajetti kómir kólemimen qamtamasyz etý boıynsha barlyq qajetti sharay qabyldady.Aldaǵy jylytý maýsymyn turaqty ótkizý maqsatynda mınıstrlik barlyq tehnıkalyq jáne uıymdastyrýshylyq is-sharalardyń oryndalýyn qamtamasyz etedi, - dedi Erlan Aqkenjenov.
Buǵan deıin energııa óndirýshi uıymdardyń otyn úshin aıtarlyqtaı kredıtorlyq bereshegi saqtalyp otyrǵanyn jazǵan edik.
