Bıyl ǵylymı ataq berý erejesine birneshe ózgeris engizildi
Ǵylym jáne joǵary bilim mınıstrligi bıyl ǵylymı ataq berý erejesine qandaı ózgeris engizilgenin jarııalady, dep habarlaıdy Kazinform.
Kazinform tilshisiniń resmı saýalyna oraı joldanǵan vedomstvo jaýabynda jazylǵandaı, osy jyly qaýymdastyrylǵan professor (dotsent) jáne professor ǵylymı ataqtaryn berý týraly erejege mynadaı ózgeris engizilgen:
- Halyqaralyq retsenzııalanatyn ǵylymı jýrnaldardaǵy maqalalar «Maqala» (Article/Artıkl) nemese «Sholý» (Review/Revıý) túrinde bolady jáne ol kórsetilgen bazalardaǵy jýrnaldyń taqyryptyq baǵytyna sáıkes keledi. Pánaralyq baǵyty boıynsha halyqaralyq retsenzııalanatyn ǵylymı maqalalardy jýrnaldarda jarııalaýǵa ruqsat etiledi (Multidisciplinary).
- Sonymen qatar Halyqaralyq retsenzııalanatyn ǵylymı jýrnaldarda 2 ǵylymı maqala retinde Elsevier, Brill, CRC Press, DeGruyter, Edward Elgar Publishing, John Wiley & Sons, McGraw Hill, Palgrave Macmillan, Peter Lang, Prentice Hall, Routledge, Sage Publications, Springer Nature, Taylor and Francis, Wolters Kluwer sııaqty senimdi baspalarda nemese US News Best Global Universities Rankings ıa bolmasa Academic Ranking of World Universities nemese Times Higher Education World University top-100 reıtıngindegi ýnıversıtet baspasynda shyǵarylǵan monografııa eskeriledi. Joǵaryda kórsetilgen baspalarda jarııalanǵan 1 bet materıal bir maqala retinde esepke alynady. Aıta keteıik, qazir elimizde 22 456 ǵylymı kadr eńbek etip júr. Zertteýshilerdiń 37 paıyzy ǵylymı jáne akademııalyq dárejege ıe. Atap aıtqanda, ǵylym doktory – 1 743, ǵylym kandıdaty – 3 945, fılosofııa doktory (PhD) – 2 460 jáne beıini boıynsha doktor – 96 adam. Sondaı-aq, zertteýshilerdiń 46 paıyzy nemese 10 327 adam – 40 jasqa deıingi jas ǵalymdar. Al 31 paıyzy nemese 6 950 adam - 41-54 jastaǵylar bolsa, 23 paıyzy (5 179 adam) - 55 jastan asqan ǵalymdar.
Eske sala keteıik, taıaýda Ǵylym jáne joǵary bilim mınıstrligi keıingi eki jylda 6 doktoranttyń dıssertatsııasynan plagıat anyqtalǵanyn málimdedi.
Munymen qatar keıingi eki jylda otandyq ǵalymdar qandaı jańalyqtar oılap tapqany jaıly jazyp edik.
