Bıyl «Fly Arystan» jeke kompanııa bolyp qaıta qurylmaq

«FlyArystan» bıyl «Air Astana» kompanııasynan bólinip shyǵady. Bul jaıynda Premer-Mınıstr Álıhan Smaıylovtyń Májilis depýtattarynyń saýalyna jaýabynda aıtylǵan, dep habarlaıdy Kazinform. 

«Búgingi tańda «FlyArystan» qurylymdyq bólimshesin jeke zańdy tulǵaǵa bólýdiń kezeńdik jospary ázirlendi. «FlyArystan» AQ Jarǵysy bekitildi. Sondaı-aq qaıta tirkeý rásimderi júzege asyrylady. Kompanııanyń uıymdyq qurylymyn qalyptastyrý, áýe kemelerin berý jáne «FlyArystan» AQ qyzmetiniń basqa da baǵyttary boıynsha jumystar júrgizilip jatyr. Onyń ishinde kirister men shyǵystardy bólek esepke alýdy engizý kózdelgen», - dedi Úkimet basshysy.

Onyń atap ótýinshe, «FlyArystan» AQ paıdalanýshynyń jeke sertıfıkatyn alýǵa qujattardy berýdi osy jyldyń 4 toqsanyna josparlap otyr.

«Bul is-sharalar básekelestik ortanyń damýyna, naryq sýbektileri arasyndaǵy básekelestik jolymen avıabıletter qunynyń tómendeýine oń áser etedi. Jalpy, avıatasymaldaý máseleleri turaqty baqylaýda», - dedi Premer-Mınıstr.