Bıyl ETS-pen ulttyq testileý júıesin reformalaý jobasy iske qosylady
ASTANA. KAZINFORM – Bıyl ETS-pen ulttyq testileý júıesin reformalaý jobasy iske qosylady. Bul týraly búgin Úkimet otyrysynda Ǵylym jáne joǵary bilim mınıstri Saıasat Nurbek aıtty.
- 2025 jyly Google, NVIDIA, Coursera, Huawei, OpenAI, ETS jáne basqa da halyqaralyq seriktestermen yntymaqtastyq jalǵastyryldy. 2026 jyly OpenAI-men birlesip oqytýshylar úshin oqý úderisterine jasandy ıntellektini engizýge baǵyttalǵan joba, al ETS-pen ulttyq testileý júıesin reformalaý jobasy iske qosylady, - dedi mınıstr.
Onyń aıtýynsha, Qazaqstanda ashylǵan 33 fılıaldyń 12-sinde arnaıy jasandy ıntellekt baǵdarlamalyry ashylǵan.
- Mysal retinde Cardiff ýnıversıtetinde jasandy ıntellekt ortalyǵy, arnaıy magıstratýra ashyldy. Qorqyt ata atyndaǵy Qyzylorda ýnıversıteti SeoulTech-pen, Satbayev University City University of Hong Kong-pen, Serikbaev atyndaǵy Shyǵys Qazaqstan tehnıkalyq ýnıversıteti Lý Ban sheberhanasynyń bazasynda birlesken baǵdarmalar bar. Sonymen qatar, 48 ýnıversıtettiń negizinde Huawei akademııalary, 17 ýnıversıtettiń negizinde arnaıy JI ortalyqtary ashyldy. «Bolashaq» baǵdarlamasy aıasynda jasandy ıntellekt baǵyty boıynsha jyl saıyn arnaıy 100 kvota bólindi, - dedi Saıasat Nurbek.
Buǵan deıin Memleket basshysy Qasym-Jomart Toqaev Educational Testing Service (ETS) kompanııasynyń prezıdenti jáne bas atqarýshy dırektory Amıt Sevakty qabyldaǵanyn jazǵan edik.
Áńgimelesý barysynda Memleket basshysy ETS kompanııasynyń bilimdi testileý men baǵalaý salasynda kósh bastap kele jatqanyna erekshe nazar aýdardy.