Bıyl Ertis jaıylmalarynyń 80 paıyzdan astamyn ǵana sý basady dep boljanyp otyr
PAVLODAR. KAZINFORM - Jiberilip jatqan sýdyń kólemi bastapqy jospardan 300 mln tekshe metrge az bolatyny anyqtaldy. Ózen boıynda ornatylǵan 14 gıdrobekette qaýipti deńgeıden asý tirkelgen joq.
Ertis ózeniniń jaıylmalaryna bıyl 6 mlrd tekshe metr sý bosatylyp jatyr.
- 13 sáýirden bastap Shúlbi sý qoımasynan negizgi sý jiberý kezeńi bastaldy. Sýdyń eń joǵary aǵyny 8 táýlik boıy sekýndyna 3500 tekshe metr boldy. Túzetýlerdi eskere otyryp, jalpy sý kólemi shamamen 6 tekshe km bolady. Bul jaıylmanyń 80-85% sý basýyn qamtamasyz etedi, - dep habarlady oblys ákimdiginen.
Ózen boıynda qazirgi kúni 14 gıdrobeket jumys istep tur. Olarda qaýipti deńgeıden asý tirkelgen joq.
Eske sala keteıik, sáýir aıynyń basynda Sý resýrstary komıtetiniń sý resýrstaryn paıdalaný jáne qorǵaý jónindegi «Ertis» basseındik ınspektsııasy Shúlbi sý qoımasynan jalpy kólemi 6,3 tekshe kılometr sý jiberiletinin habarlaǵan bolatyn.
Іs júzinde sýdyń naqty túrde bosatylýy jospardaǵydan 300 mln tekshe metrge kem bolǵaly tur.
Byltyr 6,5 tekshe km sý jiberilip, keıingi 11 jylda alǵash ret Ertis jaıylmasynyń 90 paıyzǵa jýyǵyn sý basqan edi.
