Bıyl Ertis ormanynda 14,5 mln qaraǵaı kósheti otyrǵyzylady
PAVLODAR. KAZINFORM – Qazirgi ýaqytta ormanshylar qaraǵaı kóshetterin otyrǵyzý úshin kóktemgi ylǵal jınap jatyr. Úlken qar úıindileri sabanmen, shóp qaldyqtarymen jabylady.
«Ertis ormany» rezervatynyń baspasóz qyzmeti habarlaǵandaı, bıyl orman alqaptarynda 14,5 mln qaraǵaı kóshetin egý josparlanyp otyr. Ormanshylar sáýirde aǵash egý jumystaryn júrgizedi.
– Qaraǵaı kóshetteri otyrǵyzylatyn tanaptarǵa qardy úımelep jınaımyz da, ústin qalyń shóppen, sabanmen jaýyp tastaımyz. Kómilgen qar kóktemde uzaq ýaqyt erimeı jatady. Sáýir aıynda jas kóshetterdi otyrǵyza bastaǵanda tamyryn qar kesekterimen birge kómemiz. Bul ádis kóshetterdiń tamyryna kópke deıin ylǵal berip turýǵa arnalǵan, - dep túsindirdi rezervattan.
Búginde ormanshylyqtar qarlardy úımelep, ústin jaýyp jatyr. Orman tuqymbaqtarynan qazyp alynǵannan kóshetter qarmen birge kómilgende jaqsy saqtalady. Ári bul kóshetterdiń jersinýi úshin mańyzdy.
Orman alqaptaryn ekpe kóshetpen tolyq qamtamasyz etetin eki turaqty orman tuqymbaǵy bar. Mamandar eki jyldyq qaraǵaı kóshetteriniń tamyry qajetti tereńdik boıynsha – 25-30 sm uzyndyqta kesiletinin aıtady. Kóshetti salý úshin traktorlardyń kómegimen ormanshylar jer qabatyn aýdarmaı kóteredi. Sodan soń óskinderdi qar úıindilerimen birge aparyp kómedi. Tamyry qar kesegimen jáne shóppen nyǵyzdalǵan qaraǵaı kóshetteri shilde aıyna deıin sol kúıinde jetilmeı saqtalyp turady.
Tamyryndaǵy qar tek shilde aıynda erip, kún ystyqta kóshettiń tez jetilýine nár bere bastaıdy. Osylaısha arnaıy tehnologııanyń arqasynda qaraǵaı ekpeleri jazdyń ystyq kúnderin aman-esen ótkeredi.
Ótken jyly «Ertis ormany» rezervatynda 12 mln-nan astam qaraǵaı kósheti otyrǵyzylǵan bolatyn.
Al, bıyl qysta Ertis ormanyna túlkiler qaıta oralyp jatqany týraly jazǵanbyz.