Bıyl «Ertis» fýtbol klýbynda úshinshi bas bapker qyzmetinen ketti
ASTANA. KAZINFORM - Marat Eslıamov «Ertis» fýtbol klýbynyń bas bapkeri qyzmetinen óz erkimen ketti. Bul jóninde komandanyń baspasóz qyzmeti málim etti.
- Klýb basshylyǵy Marat Joldasulyna atqarǵan jumysy jáne kásibı eńbegi úshin alǵys bildiredi. Aldaǵy qyzmetine sáttilik tileımiz, - dep jazylǵan habarlamada.
Marat Eslıamov pavlodarlyq klýb tizginin 2 shildede ustaǵan edi.
Marat Joldasuly kásibı fýtbolshy retinde «Namys», «Qaırat TsSKA», «Aqmola», «Esil» jáne «Hımık» klýbtarynda oıyn kórsetken. Bapkerlik jolynda otandyq klýbtarda, Qazaqstan jasóspirimder jáne jastar quramalarynda qyzmet atqardy.
Sondaı-aq Qazaqstan ulttyq quramasynyń bapkerler shtabynda eńbek etti.
2021 jyly «Aqsýmen» Birinshi lıganyń jeńimpazy atansa, 2022 jyly «Qaısarmen» Birinshi lıganyń kúmis júldesin ıelenip, komandany Premer-lıgaǵa shyǵardy. 2023-2024 jyldary «Ulytaý» klýbyn basqardy.
Aıta ketsek, odan buryn pavlodarlyq klýbqa belarýstik maman Kırıll Alshevskıı, qazaqstandyq maman Nurbol Jumasqalıev jetekshilik etken edi.
