Bıyl energetıka salasyna 2,66 GVt jańa qýat qosylady
ASTANA. KAZINFORM – Bıyl elektr energııasy tapshylyǵyn azaıtý úshin 2,66 GVt jańa energetıkalyq qýat iske qosylady. Bul týraly Úkimet otyrysynda Qazaqstan Respýblıkasy Energetıka mınıstri Erlan Aqkenjenov málimdedi.
– Jańa qýattar Almaty qalasyndaǵy ekinshi jáne úshinshi jylý elektr ortalyqtaryn jańǵyrtý, Túrkistan oblysyndaǵy bý-gaz qondyrǵysynyń qurylysy, Atyraý jylý elektr ortalyǵynda 11-týrbınalyq agregat pen 15-qazandyqty iske qosý, Tekeli energokeshenindegi jobalar esebinen engiziledi. Sonymen qatar jalpy qýaty 245,8 MVt bolatyn jańartylatyn energııa kózderi nysandaryn iske qosý josparlanyp otyr, – dedi mınıstr.
Onyń aıtýynsha, qazir Qyzylorda oblysynda qýattylyǵy 240 MVt bý-gaz qondyrǵysy jáne jalpy qýaty 212,6 MVt bolatyn jańartylatyn energııa kózderiniń jeti jobasy iske qosylǵan.
Jalpy, alty aıdyń qorytyndysy boıynsha elimizde 63,4 mlrd kVt/saǵ elektr energııasy óndirildi. Onyń ishinde jańartylatyn energııa kózderi nysandaryndaǵy óndiris kólemi 5,1 mlrd kVt/saǵ jetken.
Al bıyl jańartylatyn energııa kózderinen óndiriletin elektr energııasy kólemi 8,8 mlrd kVt/saǵ bolady dep boljanyp otyr.
Aıta keteıik, Úkimet otyrysynda Oljas Bektenov Almatydaǵy jylý elektr ortalyǵynyń jumys qarqynyn synǵa aldy.
