Bıyl eń kóp bilim berý granty qandaı mamandyqtarǵa bólindi
ASTANA. KAZINFORM — Joǵary bilimdi kadrlardy daıarlaýǵa arnalǵan memlekettik bilim berý tapsyrysy sheńberinde bakalavrıat deńgeıine 75 myńnan astam bilim berý granty bólindi. Granttar konkýrsyna qatysý úshin talapkerlerden barlyǵy 127 041 ótinish qabyldandy.
2026-2027 oqý jylyna arnalǵan memlekettik bilim berý granttary konkýrsynyń qorytyndysy jarııalanyp, bilim berý granttarynyń ıegerleri anyqtaldy.
Bıyl óńirlik teńgerimdi qamtamasyz etýge baǵyttalǵan arnaıy bastamalar da jalǵasyn tapty. Atap aıtqanda, «Serpin» baǵdarlamasy aıasynda 2 180 bilim berý granty, sondaı-aq elimizdiń batys óńirleriniń jastaryna 2 500 grant bólindi.
Sonymen qatar Qazaqstanda ashylǵan sheteldik joǵary oqý oryndarynyń fılıaldaryna talapkerler qabyldaý úshin 3 190 memlekettik bilim berý granty qarastyryldy.
Bilim berý granttary el ekonomıkasynyń kadrlarǵa degen boljamdy suranysyn eskere otyryp bólindi. Eń kóp grant ekonomıkanyń basym sektorlary úshin mamandar daıarlaıtyn mynadaı baǵyttarǵa berildi:
✔ Injenerlik, óńdeý jáne qurylys salalary – 16 674 grant;
✔ Pedagogıkalyq ǵylymdar – 12 228 grant;
✔ Aqparattyq-kommýnıkatsııalyq tehnologııalar – 10 387 grant;
✔ Jaratylystaný ǵylymdary, matematıka jáne statıstıka – 9 188 grant;
✔ Aýyl sharýashylyǵy jáne bıoresýrstar – 2 515 grant;
✔ Qyzmet kórsetý salasy – 2 170 grant;
✔ Óner jáne gýmanıtarlyq ǵylymdar – 1 915 grant;
✔ Áleýmettik ǵylymdar, jýrnalıstıka jáne aqparat – 1 485 grant;
✔ Bıznes, basqarý jáne quqyq – 1 423 grant;
✔ Veterınarııa – 1 175 grant.
