Bıyl elordada qansha mektep qoldanysqa beriledi
ASTANA. KAZINFORM — Astanada halyq sanynyń kóbeıýine baılanysty áleýmettik nysandarǵa degen suranys pen qajettilik artyp keledi. Bul máseleni sheshý maqsatynda memlekettik bıýdjet pen jeke ınvestıtsııa esebinen mektep, balabaqsha men medıtsınalyq uıymdar sııaqty qala turǵyndary úshin asa mańyzdy nysandardyń qurylysy úzdiksiz júrgizilip jatyr, dep habarlady elorda ákimdiginiń resmı saıty.
Máselen ótken jyly elordada 24 mektep ashylsa, bıyl taǵy birneshe bilim ordasyn paıdalanýǵa berý josparlanǵan. Astana qalasy Bilim basqarmasynyń basshysy Qasymhan Senǵazıev aldaǵy ýaqytta qaı aýdanda jáne qansha jańa nysannyń ashylatyny jaıly tolyǵyraq aıtyp berdi.
Byltyr elimizde paıdalanýǵa berilgen oqýshy orny rekordtyq kórsetkishke jetti. Salynǵan mektepterdiń sany jaǵynan elorda aldyńǵy qatarda. Ótken jyly Astanada bir aýysymda 33 myńdaı oqýshyǵa arnalǵan 24 mektep ashyldy. Onyń kóbisi «Jaıly mektep» ulttyq jobasy aıasynda boı kótergen. Atalǵan joba boıynsha salynǵan mektepter jańa oqý jylynda 22 400 elordalyq oqýshyny qabyldady.
Astana qalasy Bilim basqarmasynyń basshysy Qasymhan Senǵazıevtiń aıtýynsha, «Jaıly mektepterdiń» jeteýi Esil aýdanynda, tórteýi Nura aýdanynda, úsheýi Almaty aýdanynda, al qalǵan ekeýi Saryarqa aýdanynda ornalasqan. Sonymen qatar bıýdjettik ınvestıtsııalyq joba boıynsha 1 550 oryndyq 3 mektep, 3 240 oryndyq 5 jekemenshik mektep paıdalanýǵa berildi.
Bul elordadaǵy úsh aýysymdy, oqýshy sany shamadan artyq jáne apatty mektepterdiń máselesin sheshýge múmkindik beredi.
Óz kezeginde Qasymhan Senǵazıev elordalyq oqýshylardyń sapaly bilim alýy úshin mektep salý jumystary bıyl da jalǵasatynyn jetkizdi. 2025 jyly bir aýysymda 23 myń oqýshy sabaq oqı alatyn 15 mektep ashylady. Onyń ishinde tórteýi bıýdjettik ınvestıtsııalyq joba boıynsha salynyp, 2 700 oqýshyny qabyldaıtyn bolady. Atalǵan 4 mekteptiń ekeýi Nura aýdanynda, qalǵany Almaty aýdanynda ornalasady.
«Jaıly mektep» jobasy aıasynda mektep salý bıyl da jalǵasady.
- 2025 jyly jalpy syıymdylyǵy 22 912 oryndyq 15 mektepti paıdalanýǵa berý josparlanyp otyr. Onyń ishinde, «Jaıly mektep» ulttyq jobasy aıasynda jalpy sany 14 myń oqýshyǵa arnalǵan 7 bilim ordasy ashylady. 4 mektep Nura aýdanynda, 2 mektep Almaty aýdanynda, 1 mektep Baıqońyr aýdanynda ornalasady. Elordadaǵy jekemenshik mektepter sany da arta túsedi. Jeke ınvestordyń qarjysy esebinen salynatyn 4 mektep jańa oqý jylynda shákirt qabyldaıdy. Osylaısha bul mektepterde 6 myńnan astam oqýshy bilim alatyn bolady. 5172 oqýshyǵa arnalǵan 3 mektep Esil aýdanynda, 1040 oqýshyǵa arnalǵan 1 mektep Nura aýdanynda ornalasady, - dedi Qasymhan Senǵazıev.