Bıyl elorda ákimdigi talapkerlerge qansha grant bóledi
ASTANA. KAZINFORM — Bıyl Astanada 14 myń 200-den astam túlek mektep bitirdi. Shahar basshysy Jeńis Qasymbek túlekterdi altyn uıamen qoshtasýymen quttyqtady.
— Búginge deıingi oqý jyldary ishinde oqýshylarymyz muǵalimderimen jáne ata-analarymen birge ózderiniń eń jaqsy qasıetterin — jaýapkershiligin, tártibin, bilimge qushtarlyǵyn kórsetti. Endi túlekterimiz úshin ómirinde jańa ári jaýapty kezeń bastalady — mamandyq pen joǵary oqý ornyn tańdaý. Óz tarapymyzdan biz balalarymyzdy qoldaýdy ary qaraı da jalǵastyramyz, qalanyń Bilim basqarmasy men Jumyspen qamtý jáne áleýmettik qorǵaý basqarmasy tarapynan joǵary oqý oryndaryna 550-den astam grant bólý josparlanyp otyr. Sondaı-aq, Bilim basqarmasy qala kolledjderine (9 jáne 11-synyp negizinde) suranysqa ıe 62 mamandyq boıynsha 10 myń grant qarastyrǵan, — dep jazdy Jeńis Qasymbek Facebook paraqshasynda.
Ákimniń aıtýynsha, elordada ótken oqý jylynda rekordty kólemde bilim berý mekemesi paıdalanýǵa berildi, ıaǵnı 24 jańa mektep iske qosyldy.
— Atalǵan mektepter qalada shamamen 66 myń oqýshy ornynyń (eki aýysymda) ashylýyna múmkindik berdi. 24 mekteptiń 16-sy «Jaıly mektep» ulttyq jobasy aıasynda salyndy. Sonymen qatar, aldaǵy jyldarǵa daıyndyq jumysyn jalǵastyryp jatyrmyz. Jańa oqý jylynda taǵy 15 mektep ashýdy josparlap otyrmyz. Bilim berý nysandaryn salýǵa jeke ınvestıtsııalar da tartylyp jatyr, — deıdi qala basshysy.
Osylaısha, Jeńis Qasymbek jas túlekterge jańa ómirine sáttilik tiledi.
Eske salaıyq, búginde elimizde negizgi Ulttyq biryńǵaı testileý júrip jatyr, ol 7 shildege deıin jalǵasady.
Aıta ketsek, bıyl elimizde 217 myń túlek mektep bitirdi.