Bıyl elimizdiń JІÓ $310 mlrd-tan asty – Jumanǵarın
ASTANA. KAZINFORM – Vıtse-premer – ulttyq ekonomıka mınıstri Serik Jumanǵarın Dúnıejúzilik bank pen Halyqaralyq valıýta qory janyndaǵy Shveıtsarııalyq kishi toptyń otyrysynda sóz sóıledi. Bul týraly Úkimettiń baspasóz qyzmeti habarlady.
Ol óz sózinde Qazaqstannyń 30 jyldan asa ýaqytqa sozylǵan Dúnıejúzilik bank tobymen strategııalyq áriptestigi ekonomıkanyń ósýinde, kedeılikti tómendetýde jáne ınfraqurylymdy damytýǵa arnalǵan ekonomıkalyq reformalardy júzege asyrýda sheshýshi ról atqarǵanyn atap ótti.
– Qazaqstannyń ulttyq ekonomıkany damytý nátıjesi turaqty oń dınamıkany kórsetip otyr. Bıyl elimizdiń JІÓ $310 mlrd-tan asty. Bul Ortalyq Azııa ekonomıkasynyń 60%-y, - dep atap ótti Serik Jumanǵarın.
Sonymen qatar ol Qazaqstan ekonomıkasy úshinshi jyl qatarynan 5%-dan joǵary ósip kele jatqanyn atap ótti: 2023 jyly – 5,1%, 2024 jyly – 5%. 2025 jylǵy qańtar–qyrkúıektiń qorytyndysy boıynsha ósý – 6,3%. Bul – álemdegi eń joǵary kórsetkishtiń biri.
Onyń aıtýynsha, ekonomıkalyq ósýdiń joǵary qarqyny bolashaqta da saqtalmaq. Orta merzimdi perspektıvada Qazaqstan óz aldyna 2029 jylǵa qaraı JІÓ-ni 450 mlrd-qa deıin ulǵaıtý maqsatyn qoıyp otyr. Bul jyl saıynǵy ósý qarqynyn 5-6% deńgeıinde ustaýdy talap etedi.
– Bizdiń elimizde osyndaı ósýdi qamtamasyz etýge múmkindik beretin naqty jáne mańyzy zor múmkindikter bar. Bul turǵyda Dúnıejúzilik bankpen yntymaqtastyq ýaqtyly, senimdi jáne turaqty damýdy qamtamasyz etýdiń mańyzdy negiziniń biri, - dep atap ótti Serik Jumanǵarın.
Ol sondaı-aq Dúnıejúzilik banktiń Qazaqstanmen ózara is-qımylynyń basym baǵytyn aıqyndaıtyn jańa Seriktestik sheńber týraly kelisimniń (Partnership Framework Agreement, PFA) erekshe mańyzyn atap ótti. Kelisimdi ratıfıkatsııalaý kvazımemlekettik sektor uıymdary úshin Dúnıejúzilik bank standartyna tolyqtaı sáıkes keletin qarjy tartý tetikterine jol ashady.
Sondaı-aq Serik Jumanǵarın Dúnıejúzilik banktiń Eýropa jáne Ortalyq Azııa óńiri boıynsha vıtse-prezıdenti Antonella Bassanımen kezdesti. Taraptar ózara yntymaqtastyqtyń keleshegin talqylady. Atap aıtqanda, qazaqstandyq tarap hımııa ónerkásibi, AÓK-tegi tereń jáne ortasha óńdeý, kólik, sýmen jabdyqtaý, ırrıgatsııa júıesin jańǵyrtý jáne basqa da saladaǵy yqtımal áriptestikti talqylaýdy usyndy. Amerıkalyq tarap eksportty ulǵaıtýǵa, logıstıkany damytýǵa, ekonomıkanyń jyl saıynǵy keminde 5% ósimine qol jetkizý múmkindigine jáne Qazaqstan ekonomıkasyn damytýdyń basqa da salalaryna qyzyǵýshylyq tanytty.
Qazaqstandyq delegatsııa Dúnıejúzilik bank tobyna kiretin Halyqaralyq qarjy korporatsııasy (IFC) uıymdastyrǵan MJÁ taqyrybyndaǵy vorkshopqa qatysty. Amerıka tarapynyń ókilderi ekonomıkasynda memlekettik kompanııalardyń úlesi kóp Saýd Arabııasy, Úndistan men Indonezııa sııaqty álemniń basqa elderinde memlekettik-jekemenshik áriptestik formatynda júzege asyrǵan jobalary týraly tájirıbesimen bólisti. Sondaı-aq memlekettik-jekemenshik áriptestik formatynda jobalar jasaqtaýdyń tıimdiligin arttyrý usynyldy.
Buǵan deıin Vashıngtonǵa sapary aıasynda Qazaqstannyń vıtse-premeri – Ulttyq ekonomıka mınıstri Serik Jumanǵarınniń AQSh Kongresi múshelerimen birqatar kezdesý ótkizgenin jazǵan edik.