Bıyl elimizdiń sý júıelerin qalpyna keltirý jumystary bastalady
ASTANA. KAZINFORM – Islam damý banki elimizdiń sý sharýashylyǵy salasyna ınvestıtsııa quımaq.
QR Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtýynsha, atalǵan qarjylandyrý tıimdi ári uzaqmerzimdi (kem degende 20 jyl).
«Bıyl qazan aıynyń basynda tıisti nesıelik jobaǵa qol qoıamyz. Birinshi transhty qarasha aıynyń sońyna deıin ıgerýdi josparlap otyrmyz. Sý resýrstary jáne ırrıgatsııa mınıstrliginiń naqty jospary bar, elimizdiń 9-dan astam óńirinde sý júıelerin qalpyna keltirý jumystary bastalady», - dedi Nurlan Baıbazarov elordada ótken arab úılestirý tobynyń otyrysy barysynda BAQ ókilderiniń saýalyna jaýap bere turyp.
Mınıstrdiń aıtýynsha, Islam Damý Banki bóletin qarjy tasqyn sý basqan jáne sý tapshy óńirlerdiń sý júıelerin ilgeriletýge jumsalady.
«Sý ınfraqurylymyn qalpyna keltirý jumysy aýqymdy, sondyqtan eki kezeńge bólip otyrmyz. Birinshi kezeń 3 jyldyń ishinde aıaqtalýy kerek», - deıdi ol.
Buǵan deıin Islam damý banki elimizdiń sý sharýashylyǵyna 1 mlrd dollardan astam ınvestıtsııa quıatyny týraly habarlaǵan edik.
Aıta keteıik, búgin Astanada arab úılestirý tobynyń otyrysy ótti. Oǵan Islam damý bankiniń, OPEK halyqaralyq damý qorynyń, Kýveıt arab ekonomıkalyq damý qorynyń, Saýd Arabııasy damý qorynyń, Abý-Dabı damý qorynyń jáne Qatar damý qorynyń basshylary, sondaı-aq Qazaqstan Respýblıkasynyń memlekettik organdarynyń ókilderi qatysty.
