Bıyl elimizdiń sý-energetıka resýrstarynyń kartasy ázirlenedi
ASTANA. KAZINFORM — Jyl sońyna deıin elimizdiń sý-energetıka resýrstarynyń kartasy ázirlenedi. Bul týraly Memleket basshysy Qasym-Jomart Toqaevtyń tóraǵalyǵymen ótip jatqan Úkimettiń keńeıtilgen otyrysynda Premer-mınıstr Oljas Bektenov aıtty.
— Sý sharýashylyǵy uzaq jyldar boıy memlekettiń nazarynan tys qalyp keldi. Sizdiń arnaıy mınıstrlik qurý týraly sheshimińiz saladaǵy qordalanǵan problemalardyń sheshilýine oń yqpal etti. Byltyr 700 shaqyrym sý arnasy qaıta jańǵyrtylsa, bıyl taǵy 986 shaqyrymda kúrdeli jóndeý jumystary júrgiziledi, — dedi Úkimet basshysy.
Onyń málimetinshe, 4 sý qoımasy jańartyldy. Osy jyly taǵy da tórt nysandy jańartý jáne úsh jańa sý qoımasynyń qurylysy bastalady.
— Sý resýrstaryn keshendi basqarýdyń bas josparyna negiz bolatyn segiz basseındik jospardy ázirleý aıaqtalady. Sizdiń Ulttyq quryltaıda bergen tapsyrmańyzǵa sáıkes, jyl sońyna deıin elimizdiń sý-energetıka resýrstarynyń kartasyn ázirleımiz, — dedi Oljas Bektenov.
Buǵan deıin Premer-mınıstr óńdeý ónerkásibiniń qazirgi ósý qarqyny ekonomıkany tolyqqandy ártaraptandyrý úshin jetkiliksiz ekenin aıtqan edi.