Bıyl elimizdegi oblystyq aýrýhanalarda 22 beıindi bólimshe ashyldy
ASTANA. KAZINFORM – Jiti tapshylyq baıqalatyn terapııalyq baǵyttar boıynsha medıtsınalyq kómektiń qoljetimdiligin qamtamasyz etý maqsatynda osy jyldyń 1 qańtarynan bastap Qazaqstanda oblystyq aýrýhanalardy aýqymdy jańǵyrtý bastaldy.
Densaýlyq saqtaý mınıstrligi málimetinshe, birinshi toqsan qorytyndysy boıynsha 11 óńirde 22 beıindi bólimshe ashylyp, onda shamamen 400 patsıent em qabyldady.
Mınıstrlik pen óńirlik densaýlyq saqtaý basqarmalary birlesip bastaǵan jańǵyrtýdyń negizgi maqsaty – tósek qoryn suranysqa ıe beıinderge qaıta beıimdeý arqyly óńirlerde medıtsınalyq kómektiń qoljetimdiligi men sapasyn arttyrý.
Búginde respýblıka boıynsha 36 kópbeıindi oblystyq aýrýhana (eresekter men balalarǵa arnalǵan) jumys isteıdi. Olardyń bazasynda beıindi terapııalyq bólimsheler ashý kózdelgen.
2026–2027 jyldary elimizdiń barlyq óńirinde kezeń-kezeńimen 49 bólimshe ashylyp, 2700 tósek-oryn ornalastyrylady, onyń ishinde 302-si balalarǵa arnalǵan. Bul kardıologııa, gastroenterologııa, pýlmonologııa, endokrınologııa, revmatologııa, nefrologııa, gematologııa, otorınolarıngologııa, oftalmologııa, allergologııa jáne basqa da suranysqa ıe baǵyttardy qamtıdy.
2026 jyly 800-den astam tósek ashý josparlanǵan. Birinshi toqsannyń ózinde 11 óńirde 361 tósek-orynǵa arnalǵan 22 beıindi bólimshe iske qosyldy.
Sonymen qatar 2026 jylǵy 1 qańtardan bastap birqatar negizgi baǵyttar boıynsha tarıfter arttyryldy (gastroenterologııa, nefrologııa, abdomınaldyq hırýrgııa, juqpaly aýrýlar, kardıologııa, nevrologııa, pýlmonologııa, endokrınologııa).
Kúrdeli terapııalyq jaǵdaılarda medıtsınalyq kómek kórsetý úshin 27 quzyret ortalyǵy ashyldy. 17 sımýlıatsııalyq ortalyq iske qosylyp jatyr. Onda orta býyn medıtsına qyzmetkerleri men dárigerlerdi turaqty negizde oqytý jáne biliktiligin arttyrý júrgiziledi.
Jańa formattaǵy 19 telemedıtsına ortalyǵynyń jumysy oblystyq aýrýhanalarǵa aýyldyq densaýlyq saqtaý uıymdaryna praktıkalyq jáne konsýltatıvtik kómek kórsetýge múmkindik beredi. Sonymen qatar kadrlyq áleýetti damytý boıynsha sharalar qabyldandy. Atap aıtqanda, rezıdentýra baǵdarlamalary, sertıfıkattaý kýrstary, PІB modýldik baǵdarlamalary arqyly biliktilikti arttyrý jáne jas dárigerlerdi tartý júzege asyrylyp jatyr.
Jyl basynan beri Prezıdent Іs basqarmasy aýrýhanasynyń bazasynda (densaýlyq saqtaý menedjmenti, gospıtaldyq farmatsııa, aýrýhanaishilik ınfektsııalar jáne t.b.) modýldik baǵdarlamalar boıynsha 80-nen astam maman oqytyldy.
Jobany iske asyrý medıtsınalyq kómektiń qoljetimdiligi men sapasyn arttyrýǵa, onyń ishinde aýyl halqy úshin, múgedektik pen ólim deńgeıin tómendetýge, sondaı-aq qazaqstandyqtardyń ortasha ómir súrý uzaqtyǵyn ulǵaıtýǵa yqpal etedi.
Aıta keteıik, qazaqstandyqtar aýrýhanadaǵy týysynyń jaǵdaıyn onlaın baqylaı alady: pılottyq joba iske qosylady.
