Bıyl elimizdegi bes medıtsına ýnıversıtetin 10 570 dáriger támamdap, dıplom aldy
ASTANA. KAZINFORM — Elimizdiń bes memlekettik medıtsına ýnıversıtetiniń úzdik túlekterine dıplom tapsyrý rásimi elordalyq «Astana Opera» teatrynda saltanatty túrde ótti. Bul týraly QR Densaýlyq saqtaý mınıstrliginiń baspasóz qyzmeti málim etti.
Bıyl 10 570 qazaqstandyq jáne sheteldik stýdent dárigerlik dıplom aldy, onyń ishinde:
• Memlekettik granttardyń esebinen-5350 (50%);
• Jergilikti atqarýshy organdar men medıtsınalyq uıymdardyń granttary — 937 (9%);
• Aqyly negizde — 4190 (41%).
Memleket basshysynyń tapsyrmasyna sáıkes kadr tapshylyǵyn tómendetý jáne densaýlyq saqtaý qyzmetteriniń sapasyn arttyrý úshin jyl saıyn medıtsınalyq mamandyqtar boıynsha granttardyń sany artyp keledi.
Memlekettik granttyń esebinen oqytylǵan túlekterdiń 76%-y óńirler men medıtsınalyq uıymdarǵa bólindi, 22%-y „Bilim týraly“ Zańǵa sáıkes bólý boıynsha jumystan bosatyldy, 2%-y óz betinshe jumysqa ornalasty. Bólý kezinde praktıkalyq densaýlyq saqtaý qajettilikteri eskerilgenin aıta ketken jón. Osylaısha, medıtsına qyzmetkerleriniń tapshylyǵy orta eseppen 85%-ǵa jabylady dep kútiledi.
«Jas dárigerlerge zamanaýı tehnologııalar men tájirıbelerdi engizý, medıtsınalyq kómektiń sapasy men qoljetimdiligin jetildirý qajet. Ákimdikterdiń negizgi mindeti-jas mamandarǵa tálimgerdiń basshylyǵymen jumys isteýde de, turý úshin de tıisti jaǵdaılardy qamtamasyz etý», — dep atap ótti mınıstr Aqmaral Álnazarova.
Mınıstrlik Memleket basshysynyń tapsyrmasyn oryndaý maqsatynda aýyldyq eldi mekenderge jas mamandardy jumysqa ornalastyrý úshin birqatar sharalar qabyldady:
• 2024 jyldyń qańtar aıynan bastap aýdan ortalyqtaryna jumys isteýge kelgen mamandar úshin bıýdjettik kredıt 2 500 AEK (9,2 mln teńge) deıin, aýyldyq eldi mekender úshin — 2 000 AEK (7,3 mln teńge) deıin ulǵaıdy.
• Aýyldyq jerge keminde 5 jyl merzimge jumysqa ornalastyrylǵan asa tapshy mamandyqtardyń medıtsına qyzmetkerleri jergilikti bıýdjet qarajaty esebinen 100 ETJ (8,5 mln teńge) alady.
• Memlekettik medıtsınalyq uıymdardyń medıtsına jáne farmatsevtıka qyzmetkerleriniń halyqtyń áleýmettik osal toptarynan keıin áleýmettik qoldaý sharalaryn, jergilikti bıýdjet qarajatynyń esebinen qosymsha jeńildikter men yntalandyrýshy tólemderdi alýǵa basym quqyǵy bar.
• Medıtsına qyzmetkerleriniń balalary balabaqshaǵa qabyldanýǵa basym quqyqqa ıe bolady. Qyzmettik mindetterin atqarý nátıjesinde qaza tapqan nemese múgedek bolǵan medıtsına qyzmetkerleriniń balalary JOO-ǵa konkýrstan tys qabyldanatyn bolady.
Densaýlyq saqtaý mınıstrligi kadrlyq áleýetti arttyrý jáne medıtsına mamandary úshin eńbek jaǵdaılaryn jaqsartý boıynsha jumysty jalǵastyrady.
