Bıyl elimizdegi 100 balabaqshada eńbek pen kásipke baýlıtyn joba bastaldy

ASTANA. KAZINFORM — Balalardy erte jastan damytý, sapaly tárbıe men bilim berý maqsatynda birqatar baǵdarlamalar men jobalar júzege asyrylyp jatyr. Bul týraly Oqý-aǵartý mınıstrligi jarııalady. 

Memlekettik tildi tereńdetip úıretýge baǵyttalǵan «Tilge boılaý» jobasy ótken jyly 5 óńirde — Aqmola, Qaraǵandy, Qostanaı, Soltústik Qazaqstan oblystary men Astana qalasynda 135 balabaqshada synaqtan ótti. Joba bıyldan bastap jappaı engizildi.

Bıyl 100 mektepke deıingi uıymda «Erte jastan eńbekke jáne kásipke baýlý» pılottyq jobasy bastaldy. Sondaı-aq óńirlerde ekologııalyq jobalar júzege asyrylyp keledi. Ekologııalyq baǵytta 190-ǵa jýyq «Jasyl balabaqsha» jumys isteıdi.

Týǵan elge, qorshaǵan ortaǵa degen súıispenshilikke tárbıeleý, qamqorlyq, adaldyq, eńbeksúıgishtik sekildi daǵdylardy erte jastan qalyptastyrý maqsatynda «Adal azamat» birtutas tárbıe baǵdarlamasy menshik quqyǵyna qaramastan, barlyq balabaqshada tárbıeleý-bilim berý protsesine engizildi.

Balalary balabaqshaǵa barmaıtyn ata-analarǵa ádistemelik kómek kórsetý maqsatynda keńes berý pýnktteri ashyldy. 2023 jyly óńirlerde 3 myńnan asa keńes berý pýnkti ashylsa, búingi kúni sany eki esege kóbeıip, 6 myńnan astam keńes berý pýnktinde 60 myńnan astam ata-ana kómek aldy.

Sondaı-aq densaýlyq, tamaqtaný, damý jáne týǵannan 5 jasqa deıingi balalarmen qarym-qatynas máselelerin qamtıtyn 120-dan astam paıdaly usynys pen keńester qamtylǵan «Beske deıin úlger» mobıldi qosymshasy ázirlendi. Qazirgi ýaqytta ony 80 myńǵa jýyq ata-ana qoldanady.

Mektepaldy daıarlyqpen qamtylmaǵan balalar úshin jazǵy kezeńde qysqa merzimdi «Balaqaılar mektebi» uıymdastyryldy. Jyl saıyn mektepaldy daıarlyqtyń qysqa merzimdi kýrstarymen 100 myńǵa jýyq bala qamtylady.

Eske salaıyq, buǵan deıin Oqý-aǵartý birinshi vıtse-mınıstri Maıra Meldebekova elimizdegi balabaqshalarda 103 myń pedagog bar ekenin málimdegen edi.