Bıyl elimizde jol jóndeý kólemi boıynsha rekord ornatylady

ASTANA. KAZINFORM – Bul týraly BAQ ókilderine arnalǵan brıfıng barysynda QR Kólik mınıstri Marat Qarabaev málimdedi. 

Memleket basshysynyń tapsyrmasyna sáıkes, bıyl Keńes zamanynan beri jóndeý kórmegen joldar retke keltirilmek.

– Bıyl «Astana-Balqash-Almaty», «Taldyqorǵan-Óskemen», «Aqtóbe-Qandyaǵash» jáne «Atyraý-Astrahan» baǵyttary boıynsha atqarylyp jatqan jumystardy aıaqtaý qajet. Joldardyń jalpy uzyndyǵy 2 myń shaqyrymdy quraıdy, - dedi mınıstr.

Aıta keterligi, bıyl Prezıdenttiń tapsyrmasy sheńberinde elimizde 12 myń shaqyrym avtojol qurylys-jóndeý jumystarymen qamtylyp, rekordtyq kórsetkish tirkelmek.

«Búginde ortasha jóndeý jumystarymen 20 jyldan astam jóndelmegen joldar qamtylyp otyr. Máselen, 4 oblysty basyp ótetin «Jezqazǵan – Petropavl» avtojolynda qurylys-jóndeý jumystary jalǵasady. Aqtóbe oblysynda «Qandyaǵash-Embi-Shalqar-Yrgyz» jolyn, al Shyǵys Qazaqstan jáne Abaı oblystarynda Óskemen men Semeı arasyndaǵy avtojoldy jóndeýdi josparlap otyrmyz», - dep atap ótti vedomstvo basshysy. 

Qoıylǵan mindetterdi oryndaý maqsatynda merdiger uıymdar jol-qurylys materıaldaryn daıyndap jáne qurylys-montaj jumystaryn tolyq kólemde júrgizip jatyr. Avtojol jobalaryn ýaqtyly aıaqtaý úshin barlyq qajetti shara qolǵa alynǵan.