Bıyl elimizde sýperkompıýterler iske qosylady
ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstrligi Innovatsııalar damytý departamentiniń dırektory Darhan Myrzabaev elimizde jyl sońyna deıin sýpekompterlerdiń iske qosylatynyn jáne onyń artyqshylyǵy týraly aıtyp berdi.
«Memleket basshysynyń tapsyrmasy boıynsha 2024 jyldyń sońyna deıin «Samuryq-Qazyna» ulttyq ál-aýqat qory jáne Group42 kompanııasymen birlesip neǵurlym zamanaýı tehnologııalardy paıdalana otyryp, sýperkompıýter iske qosylatyn bolady. Osy oraıda bizdiń mınıstrliktiń paıymy – mamandandyrylǵan derekter ortalyqtarynda ornalastyra otyryp, esepteý qýatyn jalǵa alý jáne satyp alý túrinde tehnologııalyq ınfraqurylymdy (sýperkompıýter) qurýdy kózdeıdi. Jasandy ıntellekt úshin qajetti esepteý resýrstarynyń kólemi memlekettik organdardyń, joǵary oqý oryndarynyń, ǵylymı qoǵamdastyqtyń jáne jeke sektordyń qajettilikterine sáıkes aıqyndalatyn bolady», - dedi Darhan Myrzabaev Ortalyq kommýnıkatsııalar qyzmeti alańynda ótken baspasóz máslıhatynda.
Departament dırektorynyń aıtýynsha, ekonomıka sektorlary, aqparattyq tehnologııalar, qarjylyq qyzmetter, densaýlyq saqtaý, energetıka jáne óndiristi qosa alǵanda, jasandy ıntellektiden aıtarlyqtaı paıda kóredi.
«Sýperkompıýter – jasandy ıntellekt modelderin qurýǵa qyzmet etedi jáne ǵylymı, akademııalyq ortaǵa, sondaı-aq jasandy ıntellekt ónimderin jasaýda kommertsııalyq maqsatta qol jetimdi bolady. Bul jasandy ıntellekt salasyndaǵy esepteý resýrstaryna suranystyń artýyn qanaǵattandyrady. Odan bólek, tehnologııalyq ınfraqurylymdy (sýperkompıýter) iske qosý Qazaqstannyń Ortalyq Azııadaǵy jasandy ıntellektini damytý salasyndaǵy kóshbasshylyǵyn aıqyndaıdy jáne otandyq kompanııalar men kórshiles elder úshin esepteý qýattaryn (sýperkompıýter) jalǵa alýǵa múmkindik beredi», - deıdi ol.
Buǵan deıin habarlaǵanymyzdaı elimizde tsıfrlyq kodeks jáne jasandy ınttelekt týraly zań jobasy ázirlenip jatyr.
