Bıyl elimizde Starlink júıesin ornatý jalǵasady

ASTANA. KAZINFORM – Elimizdiń biraz mektebine Starlink  ınternet júıesi tartyldy. Bul júıe qanshalyqty óziniń nátıjeligin kórsetti? Bul suraqqa QR Tsıfrlyq damý, ınnovatsııalar jáne aeroǵarysh ónerkásibi mınıstrligi jaýap berdi.

- Starlink spýtnıktik ınterneti Qazaqstan mektepterinde keńjolaqty jelini qamtamasyz etý maqsatynda pılottyq joba aıasynda engizildi. 2024 jyldyń qorytyndysy boıynsha 1812 mektepke jabdyq ornatyldy. Sonymen qatar 65 mektepte qyzmet kórsetý toqtatyldy, onyń ishinde 30 mektep jabyldy, al 35 mektepte talshyqty-optıkalyq baılanys jelisi (TOBJ) tartyldy, sondyqtan olar úshin Starlink qajettiligi joıyldy. Jalpy alǵanda, Starlink ınterneti shalǵaıdaǵy mektepterdi ınternetpen qamtamasyz etýde tıimdi sheshim boldy. Qazirgi ýaqytta 1678 mektep Starlink júıesin paıdalanyp otyr, - delingen mınıstrliktiń Kazinform agenttigine bergen jaýabynda.

Aıta keteıik, vedomstvo bıyl Qazaqstan aýmaǵynda Starlink júıesin ornatý jalǵasatynyn naqtylady.

- 2025 jyly Starlink júıesin ornatý jalǵasady. Oqý-aǵartý mınıstrligimen (OAM) birlesip, mektepterdiń tizimi jańartylyp jatyr. Qazirgi kezde 1678 mektepte Starlink jabdyǵy jumys istep tur jáne jospar boıynsha qosymsha 110 mektep spýtnıktik ınternetke qosylady. Nátıjesinde jalpy tizim 1788 mektepti qamtıdy, - dep atalyp ótken Tsıfrlyq damý mınıstrligi málimetinde.

Buǵan deıin spýtnıkterdi Qazaqstannan eksporttaýǵa qatysty qaı eldermen kelisim bar ekenin jazǵan edik.