Bıyl elimizde sońǵy qońyraýdy ótkizý kúni ózgerdi
ASTANA. KAZINFORM – Bıyl elimizde mektep bitiretin túlekterdiń qurmetine arnalǵan sońǵy qońyraý saltanatty is-sharasy ótetin kún ózgertildi. Bul týraly Oqý-aǵartý mınıstrligi habarlaıdy.
- 34 aptaǵa sozylatyn oqý jyly aıaqtalýǵa jaqyn. Bıyl elimizde 3,9 mıllıonnan astam oqýshy qorytyndylap, onyń ishinde 217 myńnan astam túlek mektep bitiredi. Ótken jyldaǵydaı, sońǵy oqý kúni — 23 mamyrda elimizdiń barlyq mektebinde «Bilimim — Otanyma» taqyrybynda biryńǵaı synyp saǵaty ótedi. Bul búkil bilim berý júıesi úshin mańyzdy shara, oqýshylar men ustazdar oqý jylyn qorytyndylap, eń mańyzdy ári qyzyqty sátterdi birge eske alady,- delingen habarlamada.
Aqparatta aıtylǵandaı, biryńǵaı synyp saǵaty oqýshylardyń boıynda bilimge umtylys, patrıotızm jáne eńbekqorlyq sııaqty qasıetterdi qalyptastyrýǵa baǵyttalǵan.
- Bıyl oqý jylynyń aıaqtalýy jeksenbi kúnimen sáıkes kelgendikten, 11-synyp túlekteri úshin saltanatty shara mektep ákimshiliginiń sheshimimen 23-shi nemese 24-shi mamyrda ótkiziledi. Sondaı-aq, barlyq oqýshy úshin teń jaǵdaı men qaýipsizdikti qamtamasyz etý úshin mektep formatynan tys, sán-saltanatty is-sharalar uıymdastyrý, aqsha jınaý, avtokólikpen sherýge shyǵý jáne basqa da merekeleý túrlerine jol berilmeıtinin taǵy da eske salamyz, - dep habarlaıdy vedomstvodan.
Buǵan deıin Ǵanı Beısembaev sońǵy qońyraý kezinde ata-analar mekteptegi merekelik is-sharalarǵa shyǵyndalyp, balalardy ysyrapqa úıretpeýi kerektigin aıtyp, úndeý jasaǵan edi.
Eske salsaq, elordalyq oqýshylardyń sońǵy qońyraý saltanatty sharasyn ótkizýge qatysty jelide aqparat tarady.
Keıin Astana ákimdigi sońǵy qońyraýǵa qatysty jelide taraǵan aqparatqa túsinik berdi.