Bıyl elimizde smartfon arqyly alatyn qyzmetterdiń sany 6 ese ósti

Elimizde qyzmetterdi smartfon arqyly alý kólemi artyp keledi. Bul týraly Úkimet otyrysynda Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy Kazinform.

«Jalpy, qyzmetterdiń 93 paıyzy elektrondy túrde kórsetilip jatyr. Byltyrmen salystyrsaq, tek smartfon arqyly alatyn qyzmetterdiń sany bıyl 6 ese ósken. Kaspi, Halyk sııaqty tanymal qosymshalarda 50-den astam qyzmet kórsetiledi. Olardyń sany 33 mln-ǵa jetip, 3 ese artty. Biz proaktıvti qyzmetterdi de damytyp jatyrmyz. Proaktıvti degenimiz ne? Ol - azamattardyń júginýin kútpeı, aıtqyzbaı, memlekettiń ózi usynatyn qyzmetter. Onyń túri 40-qa jetip, sany 2 mln-nan asty», - dedi mınıstr.

Onyń atap ótýinshe, bıometrııalyq rastaý jáne QR-men qol qoıý arqyly elektrondy qyzmet alý odan saıyn jeńildetilip jatyr.

«Birikken Ulttar Uıymynyń reıtıngisi boıynsha onlaın-servıs kórsetý jaǵynan Qazaqstan dúnıe júzinde 8-shi orynda tur. Árıne, biz bunymen qanaǵattanyp qalmaımyz. Jumysty odan ári jetildire beremiz», - dedi Baǵdat Mýsın.