Bıyl elimizde qandaı mańyzdy is-sharalar ótedi
ASTANA. KAZINFORM — Qazaqstanda týrısterdi tartýǵa arnalǵan 55 iri is-shara josparlandy. Bul týraly Úkimet otyrysynda QR Týrızm jáne sport mınıstri Erbol Myrzabosynov málim etti.
— 2025 jylǵy jeltoqsanda týrısterdi tartýǵa baǵyttalǵan iri is-sharalardyń kúntizbesi bekitildi. Búginde josparlanǵan 55 is-sharanyń 17-si ótkizildi. Olarǵa jalpy kelýshiler sany 150 myń adamnan asty. Ótkizilgen is-sharalardyń joǵary uıymdastyrý deńgeıin atap ótken jón. Olardyń qatarynda Sıvers almasynyń gúldený festıvali, PGL kıbersporttyq týrnıri jáne «Tary Fest» etnofestıvali bar. Óńirlerdiń aldynda ótkiziletin is-sharalardyń týrıstik jáne ekonomıkalyq tıimdiligin arttyrý, sondaı-aq olardyń salany damytýǵa qosatyn úlesin kúsheıtý mindeti tur, — dedi E. Myrzabosynov.
Onyń aıtýynsha, osy jyldyń mańyzdy oqıǵalarynyń biri — 29 shilde men 9 tamyz aralyǵynda Astana qalasynda ótetin «Bolashaq oıyndary» halyqaralyq týrnıri. Týrnırge álemniń 50-den astam elinen shamamen 900 sportshynyń, halyqaralyq sport uıymdarynyń, tsıfrlyq ındýstrııa ókilderiniń, buqaralyq aqparat quraldarynyń jáne jankúıerlerdiń qatysýy josparlanǵan.
— Týrnır týrıster aǵynyn arttyrýǵa yqpal etedi. Sondaı-aq elordadaǵy qonaqúı, kólik jáne servıstik ınfraqurylymǵa qosymsha suranys qalyptastyrady. Týroperatorlar Oıyndardy tamashalaý men elordamyzdyń mádenı kórikti jerlerin aralaýdy qamtıtyn arnaıy týrıstik paketter ázirledi. Jarystar halyqaralyq standarttarǵa sáıkes keletin Astananyń 4 sport nysanynda ótedi. Ashylý saltanaty 2026 jylǵy 29 shildede «Barys Arena» muz saraıynda ótedi, — dedi mınıstr.
Buǵan deıin týrızm salasynda 600 myńnan astam adam jumyspen qamtylǵanyn jazǵan edik.
