Bıyl elimizde Áz-Naýryz qalaı toılanady
ASTANA. KAZINFORM – Bıyl Áz-Naýryzdyń biregeı logotıpi bekitilip, elimizdiń barlyq aımaǵyna jiberildi. Elimizdiń túkpir-túkpirinde túrli mádenı-sporttyq is-sharalar ótkizilip, meıramnyń maǵynasy aıshyqtala túspek.
Ortalyq kommýnıkatsııalar qyzmetinde ótken brıfıngide QR Mádenıet jáne aqparat mınıstrligi Mádenıet komıteti tóraǵasynyń orynbasary Sábıt Barlybaev Áz-Naýryzdy toılaýdyń is-sharalarymen bólisti.
Onyń aıtýynsha, tarıhta Naýryzdy toılaý 8-9 kúnge jalǵasqan. Ony «Naýryznama» dep ataǵan. Bul týraly derekter uly fılosof-jazýshylarymyz Mahmud Qashqarıdiń, Máshhúr Júsip Kópeıulynyń, Abaı Qunanbaıulynyń, Muhtar Áýezovtiń eńbekterinde jazylǵan.
«14 naýryz Kórisý kúni – Amal merekesi dep atalady. Bul dástúr negizinde elimizdiń batys óńirlerinde saqtalǵan. Búginde atalǵan merekeni barlyq aımaqtarda toılaý usynyldy. Halyq úshin bul — qasterli ári orny erekshe dástúr. 15 naýryz «Qaıyrymdylyq kúni» etip belgilendi. Bul kúndi el boıynsha qaıyrymdylyqqa, meıirim men tatý kórshilikke arnaımyz. Qoǵamǵa qaıyrymdylyq kórsetý mádenıetin sińirip, janashyrlyq pen ózara qol ushyn berý qundylyqtaryn qalyptastyrýymyz qajet. 16 naýryz «Mádenıet jáne ulttyq salt-dástúr kúni» etip belgilendi. Bul kún mádenıetimizdi, ónerimiz ben ulttyq qundylyqtarymyzdy nasıhattaýǵa arnalyp, respýblıka boıynsha túrli is-sharalardy ótkizý josparlanýda», – dedi S. Barlybaev.
Al, 17 naýryz «Shańyraq kúni» bolyp belgilendi. Osy kúni otbasylyq qundylyqtardy dáriptegen, ónegeli urpaq tárbıelegen úlgili otbasylarǵa arnalǵan mádenı is-sharalar ótedi. 18 naýryz kúni Ulttyq kıimderge arnalady. Naýryznamanyń onkúndiginde elimizdiń barlyq óńirinde ulttyq kıimderdi nasıhattaýǵa baǵyttalǵan túrli is-shara ótkizý usynylyp otyr.
«19 naýryz – Jańarý kúni. Osy kúni kóktemgi aǵash egý dástúrin jalǵastyrý usynyldy. 20 naýryz Ulttyq sport kúni etip belgilendi. Bul kúni eldiń barlyq aımaqtarynda ulttyq sporttan túrli jarystar uıymdastyrylady. El ishinde ótkiziletin at jarystar - báıge, kókpar, aýdaryspaq, jamby atý, teńge ilý, qusbegilik jáne asyq atý, toǵyzqumalaq, sadaq tartý týrnırleri qarapaıym halyqtyń shynaıy mereke saltanatyn sezinýine múmkindik beredi», – dedi spıker.
21 naýryz Yntymaq kúni dep jarııalanǵan. Onyń basty maqsaty – jalpy halyq arasynda bir-birine degen syı-qurmetti arttyryp, tatýlyq pen birlikti nasıhattaý.
22 naýryz – Jyl basy. Bul kúni elimizdiń barlyq óńirinde jalpyhalyqtyq mádenı-sporttyq is-sharalar ótkizilip, stıldi etnoaýyldar men túrli jármeńke uıymdastyrylady. 14-23 naýryz aralyǵynda «Naýryz-bazarlyq» maýsymy jarııalanady. Bul kúnderi saýda oryndarynda jappaı satylymdar ótedi.
«Al, Naýryznamanyń qorytyndy kúni, jańa jyldy tutas el bolyp, jańa maqsat, jańa úmitpen qarsy alýdyń sımvoly retinde 23 naýryz Tazarý kúni etip jarııalanady. Bul kúni Qazaqstannyń barlyq aımaqtarynda jalpyulttyq ekologııalyq aktsııa ótedi», – dedi S.Barlybaev.
Sonymen qatar Mádenıet jáne aqparat mınıstrligi Naýryz merekesin toılaýǵa arnalǵan jalpy respýblıkalyq jospar ázirlegen. Qujatta barlyq formattaǵy is-sharalar qamtylǵan. Jalpy respýblıka boıynsha 10 myńnan astam is-shara ótkiziledi. Al, basty mereke 21 naýryz kúni Astana qalasyndaǵy EKSPO kórmesiniń aýmaǵynda ótedi. Mereke aıasynda kıiz úıler qurylyp, túrli mádenı-sporttyq is-sharalar uıymdastyrylady. Qazirgi tańda merekeniń tujyrymdamasy bekitilip, daıyndyq júrgizilip jatyr.
