Bıyl elimizde alǵash ret taqtatas munaıy óndiriledi
ASTANA. KAZINFORM — Premer-mınıstr Oljas Bektenov Úkimettiń keńeıtilgen otyrysynda munaı-gaz salasyndaǵy áleýetti jobalarǵa toqtaldy.

— 2024 jyly QazMunaıGaz Qyzylorda, Atyraý jáne Aqtóbe oblystarynda tórt joba boıynsha burǵylaý jumystaryn bastady. Bul jobalardyń jıyntyq geologııalyq resýrstary munaı ekvıvalenti boıynsha 800 mln tonnadan asady. Bıyl alǵashqy qazaqstandyq taqtatas munaıy óndiriledi dep kútilýde. Bul munaı men gaz salasyna ınvestıtsııalar tartý úshin qosymsha serpin beredi, — dedi Úkimet basshysy.
Premer-Mınıstr «Batys Prorva» jáne «Barhannaıa» ken oryndarynda shamamen 19 mlrd tekshe metr gazdyń qoryn ıgerý bastalatynyn málim etti.
— Qaraǵandy oblysynda jerde sırek kezdesetin metaldardyń 17 túri bar iri ken orny tabyldy. Sonymen qatar osy Qaraǵandy oblysynda elektromobılderge arnalǵan batareıalar óndirisinde qoldanylatyn grafıt kontsentratyn óndirý boıynsha tehnıkalyq-ekonomıkalyq negizdeme ázirlenip jatyr. Qashaǵan men Jańaózende Gaz óńdeý zaýyttarynyń qurylysy jalǵasýda. Qashaǵandaǵy ekinshi Gaz óńdeý zaýyty men Qarashyǵanaqtaǵy Gaz óńdeý zaýytynyń jobalaý jumystaryn bastaý úshin ınvestıtsııalyq sheshimderdiń qabyldanýyn kútip otyrmyz, — dedi Oljas Bektenov.
Aıta keteıik, elordada Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.