Bıyl elimizde 9 jańartylatyn energııa nysany paıdalanýǵa beriledi

ASTANA. KAZINFORM – Bıyl elimizde 9 jańartylatyn energııa nysany paıdalanýǵa beriledi. Bul týraly QR EM Jańartylatyn energııa kózderi departamentiniń dırektory Jaslan Qasenov aıtty. 

— Qazaqstan boıynsha 156 jańartylatyn energııa kózi (JEK) iske qosylǵan, onyń ishinde 63 jel jáne 48 kún elektr stantsııasy bar. 2025 jyly jalpy qýaty 455,5 MVt bolatyn taǵy 9 nysan paıdalanýǵa beriledi. Qytaı, Frantsııa, BAÁ jáne Reseıdiń strategııalyq ınvestorlary Qazaqstanmen 5 GVt-qa jýyq jobalardy birlesip júzege asyrýdy josparlap otyr, - dedi ol Power Central Asia + China óńirlik energetıkalyq forýmynda energetıka salasyndaǵy basty jetistikter men aldaǵy josparlar týraly aıta kele.

Sondaı-aq ol Úkimettiń basty maqsaty — eldiń energetıkalyq teńgerimindegi JEK úlesin 15%-ǵa deıin arttyrý ekenin atap ótti.

— Osy maqsatta 2030 jylǵa deıin jalpy qýaty 2258 MVt bolatyn 91 jańa jobany iske qosý kózdelip otyr. Sol arqyly JEK-tiń ornatylǵan jalpy qýaty 10 GVt-qa jetedi, - dedi departament basshysy. 

Aıta ketelik elimizde «jasyl» energetıkanyń qýaty 17 esege artqany týraly jazǵan edik.