Bıyl elimizde 88 myńnan astam tirkelmegen SIM-karta tárkilendi

ASTANA. KAZINFORM – Jyl basynan beri el aýmaǵynda 74 qurylǵy men 88 myńnan asa tirkelmegen SIM-karta tárkilendi. Bul týraly Іshki ister mınıstrligi kıberqylmysqa qarsy is-qımyl departamentiniń bastyǵy Jandos Súıinbaı málim etti.

- Baılanys operatorlarymen birlesip, tirkelmegen SIM-kartalardy ınternet arqyly qońyraý shalýǵa jáne anonımdi akkaýnttar ashýǵa paıdalanatyn SIM-bokstar anyqtalyp jatyr. Bıyl el aýmaǵynda 74 qurylǵy men 88 myńnan asa tirkelmegen SIM-karta tárkilendi. Atap aıtqanda, Astana, Almaty, Qaraǵandy, Atyraý jáne Semeı qalasynan tabyldy,- dedi Jandos Súıinbaı ortalyq kommýnıkatsııalar qyzmeti alańynda ótken baspasóz máslıhatynda.

ІMM ókiliniń málimdeýinshe, tirkelmegen SIM-kartany paıdalaný áreketine qatysty 30 kúdikti qamaýǵa alyndy, onyń 14-i shetel azamaty.

- Internet keńistigine turaqty túrde monıtorıng júrgizilip otyrady, nátıjesinde zańǵa qaıshy mazmundaǵy 59 myń ınternet-resýrs anyqtalyp, buǵattaýǵa joldandy. Jaǵdaıdy turaqtandyrý jáne jumys sapasyn arttyrý maqsatynda toqsan saıyn respýblıkalyq jedel profılaktıkalyq is-shara ótkizilip turady,- dep tolyqtyrdy vedomstvo ókili.

Eske salaıyq, elimizde SIM-karta satyp alý tásili ózgeredi, osy oraıda neni eskergen jón ekenin siltemege ótip, tanysýǵa bolady.