Bıyl elimizde 60,5 mlrd tekshe metr gaz óndiriledi

ASTANA. KAZINFORM – Elimizde gaz óndirisi Qarashyǵanaq, Teńiz jáne Qashaǵan ken oryndary esebinen óndiriledi.

«Sońǵy jyldary elimizde gaz óndirýdiń turaqty ósýi – gaz salasynyń damý qarqynynyń aıǵaǵy. Bıyl 60,5 mlrd tekshe metr gaz óndirýdi josparlap otyrmyz. Osy jyldyń birinshi jartyjyldyǵynda 30 mlrd tekshe metr gaz óndirildi, bul bıylǵy jospardyń 49,5%-y. Gaz óndirýdiń negizgi ósimi iri ken oryndary – Qarashyǵanaq, Teńiz jáne Qashaǵan. Ótken jyly taýarlyq gazdy óndirý kólemi 29,8 mlrd tekshe metr boldy, bıyl 29,8 mlrd tekshe metrge jetkizýdi josparlap otyrmyz. Onyń ishinde birinshi jartyjyldyqta 14,9 mlrd tekshe metr gaz óndirildi, bul jospardyń 50%-y», - dedi Energetıka mınıstri Almasadam Sátqalıev Úkimet otyrysynda.

Mınıstrdiń málimetinshe, ótken jyly 1,6 mln tonna suıytylǵan munaı gazy óndirilgen.

«Osy jylǵy jospar da 1,6 mln tonna jáne osy jyldyń birinshi jartyjyldyǵynyń qorytyndysy boıynsha 0,8 mln tonna óndirildi. Bul osy jylǵa arnalǵan jospardyń 53,3%-y», - deıdi ol.