Bıyl elimizde 320 orman órti tirkeldi

ASTANA. KAZINFORM – Bıyl elimizde 300-den astam orman órti tirkelgen. Olardyń basym bóligi – naızaǵaıdyń áserinen, al birqatary – adam áreketinen týyndaǵan.

– Órt qaýpi bes deńgeıge bólinedi. Eń joǵarǵysy – besinshi synyp. Negizinen jaz mezgilinde, kún qatty ysıtyn ýaqyttarda tirkeledi. Bıyl 320 orman órti bolǵan. Onyń 217-si naızaǵaıdyń áserinen shyqqan. Naızaǵaı qurǵaq shópke túsken jaǵdaıda birneshe mınýt ishinde janyp, orman órtine ulasýy múmkin, - deıdi Orman sharýashylyǵy jáne janýarlar dúnıesi komıtetiniń bas sarapshysy Rınat Nurǵazın Jibek Joly arnasynyń «Búgin LIVE» baǵdarlamasyna bergen suhbatynda.

Adam faktory da eleýli másele bolyp otyr. Anyqtalǵan 12 órt oqıǵasy tikeleı demalýshylardyń áreketinen shyqqan.

– Kóbine bul – temeki tuqylyn, janǵysh zattardy nemese shyny bótelkelerdi tastap ketý saldarynan bolady. Qazirgi tańda osyndaı quqyq buzýshylyqtarǵa 52 mln teńge shamasynda aıyppul salyndy. Onyń 12 mıllıonyn óndirip aldyq. Keıbir ister sotqa joldandy, - dep naqtylady Nurǵazın.

Komıtet ókili árbir orman órti boıynsha qyzmettik tekseris júrgiziletinin atap ótti. Arnaıy komıssııa órttiń sebebin anyqtap, kináli tulǵalardy aıqyndaıdy. Qajet jaǵdaıda qylmystyq is qozǵalady.

– Jaza árbir oqıǵanyń sıpatyna qaraı belgilenedi. Bizde ár orman túrine qaraı túrli ákimshilik jaýapkershilik qarastyrylǵan. Bunyń bári Ekologııa mınıstrliginiń arnaıy buıryǵymen bekitilgen, - dedi sarapshy.

Mınıstrlik pen jergilikti atqarýshy organdar orman sharýashylyqtaryn saqtaý úshin aldyn alý sharalaryn kúsheıtýde. Bul baǵytta 2024–2027 jyldarǵa arnalǵan keshendi jospar qabyldanǵan. Qujat aıasynda 68 mıllıard teńge bólinip, tehnıkalyq jaraqtandyrý josparlanǵan.

– Alaıda ormandy saqtap qalýda azamattardyń da róli zor. Árkim ormanda ózin durys ustaýdy, balalaryn da soǵan úıretýdi, alaý jaqqannan keıin mindetti túrde sóndirýdi, janǵysh zattardy qaldyrmaýdy bilýi qajet. Bul – bizdiń ortaq jaýapkershiligimiz, - dep atap ótti spıker.

Rınat Nurǵazınniń málimetinshe, qazir ormandy aýmaqtarǵa týrıster kóptep kele bastaǵan. Olardyń kóbeıýi qaýipsizdik máselesin de kúrdelendirip otyr.

– Orman sharýashylyǵy qyzmetkerleri týrısterge arnap túsindirý jumystaryn júrgizýde. Habarlamalar taratylyp, profılaktıkalyq dárister oqytylyp jatyr. Bul – ormandy tilsiz jaýdan saqtap qalýdyń birden-bir joly, - dedi komıtet ókili.

Aıta keteıik, jaqynda ǵana Almaty mańyndaǵy óndiristik aımaqtan órt shyqty.