Bıyl elimizde 300 myńǵa jýyq adam sportpen aınalysa bastaǵan

ASTANA. KAZINFORM — 

Memleket basshysy Qasym-Jomart Kemeluly Toqaev otandyq sportty qoldaý men sportshylarǵa jaǵdaı jasaýdy turaqty nazarda ustap keledi. Prezıdenttiń bastamalary negizinde elimizde buqaralyq jáne balalar sporty qarqyndy damyp jatyr.

Ótken jyldyń qorytyndysy boıynsha dene shynyqtyrýmen jáne sportpen júıeli túrde 8,5 mıllıonǵa jýyq adam aınalysady. Bul — jalpy halyqtyń 41,4%-y. Onyń ishinde:

• 6 021 117 adam (72%) — erler;
• 2 385 096 adam (28%) — áıelder;
• 3 mıllıonǵa jýyq adam aýyldyq jerlerde sportpen turaqty shuǵyldanady.

— Bul kórsetkish aldyńǵy jylmen salystyrǵanda 300 myńnan astam adamǵa artqan. Mınıstrliktiń negizgi maqsaty — 2029 jylǵa qaraı sportpen shuǵyldanýshylar úlesin 50%-ǵa jetkizý. Balalar sporty — basty basymdyqtardyń biri. Bıyl memlekettik sport tapsyrysyn oryndaý úshin jergilikti bıýdjetten 50 mlrd teńge bólinip, 7 myńnan astam sport sektsııasy ashyldy. Sonyń nátıjesinde 240 myńnan astam bala tegin sporttyq úıirmelerge qatysý múmkindigine ıe boldy, — delingen habarlamada.

Sonymen qatar, respýblıka boıynsha 912 jasóspirimder klýby jumys istep, 298 myńnan astam balalar men jasóspirimderdi sportpen qamtyp otyr.

Bul baǵdarlamalarǵa degen suranys óte joǵary. Sondyqtan jergilikti atqarýshy organdardyń mindeti — sportty damytýǵa arnalǵan qarjylandyrýdy barynsha qamtamasyz etý.

Qazaqstanda buqaralyq sportty damytý — halyqtyń densaýlyǵyn nyǵaıtýdyń, salaýatty ómir saltyn qalyptastyrýdyń jáne jas urpaqty tárbıeleýdiń basty tetigi bolyp sanalady.

Osydan buryn 15 jastaǵy sportshy jarysta moıyn omyrtqasyn syndyryp, aýyr halde aýrýhanaǵa túskenin jazǵanbyz.