Bıyl elimizde 172 mektepke deıingi uıym ashyldy – Oqý-aǵartý mınıstrligi

ASTANA. KAZINFORM - Alǵashqy jartyjyldyqtyń qorytyndysy boıynsha bıyl elimizde 13,2 myń oryndy qamtıtyn 172 mektepke deıingi uıym ashyldy, dep habarlaıdy Oqý-aǵartý mınıstrliginiń baspasóz qyzmeti.

- Bul 2 jastan 6 jasqa deıingi balalardyń 93,1 paıyzyn mektepke deıingi bilimmen qamtýǵa múmkindik berdi.

Mektepke deıingi bilimmen qamtýdy arttyrý qurylys júrgizý, qoldanystaǵy balabaqshalardy keńeıtý, turǵyn úılerdiń birinshi qabattarynda shaǵyn ortalyqtar ashý, memlekettik bilim berý tapsyrysyn ornalastyrý, onyń ishinde «aqsha balaǵa beriledi» qaǵıdaty boıynsha vaýcherlik qarjylandyrý esebinen júzege asyrylýda, - delingen aqparatta.

Derekke qaraǵanda, jańa vaýcherlik qarjylandyrý tetigi elimizdiń 19 qalasynda jáne 7 aýdanynda iske asyryldy. Ol arqyly 300 myńǵa jýyq bala mektepke deıingi bilimge qol jetkizdi, al kezek 44 paıyzǵa qysqardy.

Sonymen qatar mektepke deıingi uıymdarǵa barmaıtyn balalardyń ata-analaryna arnalǵan konsýltatsııalyq pýnktter jelisi keńeıdi. Jyl basynan beri olardyń sany 4,2 myńnan 5,5 myńǵa deıin artty.

Budan bólek, 260 memlekettik balabaqshada jóndeý jumystary júrgizilýde jáne olardyń materıaldyq-tehnıkalyq bazasy nyǵaıtylýda.

Eske sala keteıik, búginde elimizdegi 11,8 myńnan astam balabaqshada 1 mıllıonnan astam bala tárbıelenýde.

Aıta keteıik, mektepterde býllıngti azaıtqan «DosbolLIKE» baǵdarlamasy endi búkil elge engiziledi.