Bıyl eldegi eń uzyn avtomobıl tonneli qoldanysqa beriledi

ASTANA. KAZINFORM – Úkimet otyrysynda Kólik mınıstri Marat Qarabaev bıyl qaı joldarda jóndeý aıaqtalatynyn aıtty.

«Elimizdiń batysynda uzyndyǵy 368 shaqyrym bolatyn «Atyraý – Astrahan» (272 km) jáne «Aqtóbe – Qandyaǵash» (96 km) jobalary iske asyrylýda. Búgingi tańda 60 shaqyrymy paıdalanýǵa berildi.

102 shaqyrymynda asfalt tóseý jumystary tolyq aıaqtaldy. 206 shaqyrymynda asfalttyń tómengi qabaty tóselýde. Jobaǵa 450 jol tehnıkasy jáne 600 adam jumyldyrylǵan. Jalpy jyl sońyna deıin bul nysandar tolyǵymen iske qosylatyn bolady», - dedi Marat Qarabaev.

Mınıstr bıyl jóndeý jumystary tolyq aıaqtalatynyn joldardy atady.

«Birinshi, Túrkistan oblysy Shaqpaq baba asýyndaǵy Qazaqtandaǵy eń uzyn avtomobıl tonneli (840 m.) shilde aıynda paıdalanýǵa beriledi. Tonneldiń ashylýy qys mezgilinde júrgizýshilerge kedergisiz júrýge múmkindik beredi.

Ekinshi, Almaty aglomeratsııasy úshin tranzıttik mańyzy zor, uzyndyǵy 6 shaqyrym bolatyn Shamalǵan stantsııasyndaǵy avtomobıl jol aıryǵy qyrkúıek aıynda iske qosylady.

Úshinshi, elimizdiń ortalyq jáne soltústik óńirlerin «Batys Qytaı – Batys Eýropa» dálizimen baılanystyratyn 262 shaqyrymdyq Merke-Býrylbaıtal avtojoly paıdalanýǵa beriledi», - dedi ol.

Marat Qarabaev Shyǵys Qazaqstandaǵy Buqtyrma sý qoımasy arqyly salynyp jatqan 1 300 metrlik kópirdi de bıyl salyp bitirý josparlanǵanyn aıtty.

«Besinshi. Batys Qazaqstannyń shalǵaıyndaǵy Bókeı Ordasy týrıstik aımaǵyn damytý maqsatynda uzyndyǵy 245 shaqyrym bolatyn Kaztalovka-Jánibek jáne Ónege-Bısen-Saıqyn avtomobıl joldarynyń kúrdeli jóndeý jumystary da osy jyldyń sońyna deıin tolyqtaı aıaqtalatyn bolady», - dedi mınıstr.