Bıyl eldegi 32 aýdıt nátıjesi boıynsha 200-den astam sheneýnik jazalandy

ASTANA. KAZINFORM — Bıylǵy 32 aýdıtten keıin tártiptik jaýapkershilikke 204 laýazym ıesi tartyldy. Bul týraly Joǵary aýdıtorlyq palatanyń tóraǵasy Álıhan Smaıylov málim etti.

- Bıyl 32 aýdıtti aıaqtadyq, al byltyr osyndaı 27 aýdıt qamtylǵan edi. Tekserý aıasynda 70 trln teńgeden astam qarajat qamtyldy jáne 2 trln teńge somasynda túrli talaptardy buzý derekterin anyqtadyq. Onyń ishinde shamamen 500 mlrd teńge qarjy salasyndaǵy talaptardy buzý jáne 1,5 trln teńgeden sál astamy bıýdjet qarajatyn tıimsiz paıdalaný men men josparlaýǵa qatysty, - dedi Á. Smaıylov Májilistiń jalpy otyrysynan keıin tilshiler suraǵyna jaýap bere otyryp. 

Onyń aıtýynsha, osy jyly 193 jeke jáne zańdy tulǵa ákimshilik jaýapkershilikke, 204 laýazym ıesi tártiptik jaýapkershilikke tartyldy.

- Qylmystyq quqyq buzý belgileri bar 70 materıaldy quqyq qorǵaý organdaryna joldaý týraly sheshim qabyldandy. Onyń 44-i jiberildi, endi qalǵan 26-syn joldaımyz, - dedi JAP basshysy. 

Budan buryn habarlanǵandaı, búgin Májiliste Joǵary aýdıtorlyq palatanyń tóraǵasy jeke kásipkerlik sýbektilerine memlekettik qoldaý sharalaryn kórsetý tıimdiligine júrgiziletin memlekettik aýdıt boıynsha esepti jarııalady.