Bıyl elde balalardyń jazǵy demalysy qalaı uıymdastyrylady
ASTANA. KAZINFORM — 2025-2026 oqý jylynyń aıaqtalýyna az ǵana ýaqyt qaldy. Osy oraıda Qazaqstan óńirlerinde jalpy qansha jazǵy demalys lageri ashylady? Elimizde jazǵy lagerlerdiń tapshylyǵy máselesi sheshildi me? Bul suraqqa QR Oqý-aǵartý mınıstrligi jaýap berdi.
— Qazirgi kezde 192 maýsymdyq, jyl boıy jumys isteıtin 18 saýyqtyrý ortalyǵynda jáne 10 myńnan astam mektep janyndaǵy lagerlerde 3 mln-nan astam balany demalys, bos ýaqytty uıymdastyrý jáne saýyqtyrý sharalarymen qamtý josparlanǵan. Jergilikti atqarýshy organdarymen balalar saýyqtyrý ortalyqtarynyń tapshylyǵy máselesi kezeń-kezeńimen sheshilip keledi. Memleket basshysynyń tapsyrmasyn oryndaý maqsatynda Balalardy saýyqtyrý jáne olardyń shyǵarmashylyq, zııatkerlik áleýetin damytý jónindegi 2024 — 2026 jyldarǵa arnalǵan jol kartasy aıasynda 50 balalar saýyqtyrý ortalyǵynyń qurylysy júrip jatyr, — delingen mınıstrliktiń Kazinform agenttigine bergen jaýabynda.
Vedomstvo aqparatyna qaraǵanda, jazǵy kezeńde 3 mln-nan astam bala saýyqtyrý sharalarymen qamtylmaq. Onyń ishinde 500 myńnan astam áleýmettik osal otbasylardan shyqqan balalardy tegin demalyspen qamtý josparlanǵan.
— Osy jyly saýyqtyrý ortalyqtaryna jiberý kezinde az qamtylǵan otbasylardaǵy balalardyń, erekshe kútimdi qajet etetin balalarǵa, sondaı-aq bilim salasynda túrli jetistikterge jetken balalarǵa basymdyq beriledi. Qazaqstan Respýblıkasy Úkimetiniń 2008 jylǵy 25 qańtardaǵy № 64 Qaýlysyna sáıkes, jergilikti atqarýshy organdar jergilikti bıýdjetterde qosymsha qarajat kózderin qarastyrady, — dep atalyp ótken Oqý-aǵartý mınıstrligi aqparatynda.
Bul qarajat bilim berý uıymdarynyń oqýshylary men tárbıelenýshileriniń kelesi sanattaryna qala syrtyndaǵy jáne mektep janyndaǵy demalys lagerlerine joldamalar berý úshin baǵyttalady:
— memlekettik ataýly áleýmettik kómek alýǵa quqyǵy bar otbasylardan shyqqan balalarǵa;
— memlekettik ataýly áleýmettik kómek almaıtyn, jan basyna shaqqandaǵy tabysy eń tómen kúnkóris deńgeıiniń shamasynan tómen otbasylardan shyqqan balalarǵa;
— otbasylarda turatyn jetim balalarǵa jáne ata-anasynyń qamqorlyǵynsyz qalǵan balalarǵa;
— tótenshe jaǵdaılardyń saldarynan shuǵyl járdemdi talap etetin otbasylardan shyqqan balalarǵa;
— bilim berý uıymynyń alqaly basqarý organy aıqyndaıtyn oqýshylar men tárbıelenýshilerdiń ózge de sanattaryna.
Mınıstrliktiń habarlaýynsha, elimizde saýyqtyrý ortalyqtary aqyly negizde de tıisti qyzmetter uıymdastyrady. Osy ortalyqtarda demalýdyń ortasha quny 130 myń teńgeni quraıdy.
Aıta keteıik, jyl basynda Parlament Májilisinde balalar lagerlerin lıtsenzııalaýdy jazǵa deıin tolyq engizý máselesi kóterilgen edi.
Eske salsaq, byltyr Qazaqstanda balalar lagerine joldama quny qansha ekenin jazǵan edik.