Bıyl el ekonomıkasynyń damýy 2012 jyldan bergi eń joǵary kórsetkishke jetti - Serik Jumanǵarın

QYZYLORDA. KAZINFORM – Qyzylordadaǵy V Ulttyq quryltaıdyń alǵashqy jumys kúni tús aýa ekonomıkalyq damý sektsııasyna ulasty.

QR Premer-mınıstriniń orynbasary-Ulttyq ekonomıka mınıstri Serik Jumanǵarın elimizdiń 2025 jylǵy ekonomıkalyq damý qorytyndylary men bıylǵy jospary týraly baıandady.

- Ótken jyly eldiń jalpy ishki ónimi 300 mlrd AQSh dollaryna, al jan basyna shaqqandaǵy jalpy ishki ónim shamamen 15 myń AQSh dollaryna jetti. Ekonomıkanyń ósý qarqyny 6,5% boldy. Bul — 2012 jyldan bergi eń joǵarǵy kórsetkish. Ekonomıkanyń barlyq salasynda oń dınamıka qalyptasty. Jalpy ishki ónimniń ósý úlesi negizinen óńdeý ónerkásibi, saýda, kólik qyzmeti, qurylys salalaryna tıesili, - dedi mınıstr.

Onyń aıtýynsha, aýyl sharýashylyǵyndaǵy jalpy ónim — 5,9%, al onyń jalpy ishki ónimdegi úlesi 5%-ǵa jaqyndady. Ótken jyly dándi daqyldardan 27,1 mln tonna ónim jınalyp, ekinshi jyl qatarynan rekord ornady.

Buǵan deıin Qyzylorda qalasynda V Ulttyq quryltaı aıasynda ótip jatqan sektsııalyq otyrysta Ulttyq ǵylym akademııasynyń prezıdenti Aqylbek Kúrishbaev ǵylymdy ekonomıkaǵa beıimdeý máselesin kótergen bolatyn.