Bıyl ekologııalyq volonterlikti damytý baǵdarlamasy qabyldanady
ASTANA. KAZINFORM – Bıyl ekologııalyq volonterlikti damytý baǵdarlamasy qabyldanady. Bul týraly Mádenıet jáne aqparat mınıstrliginen málim etti.
- 2020 jyl Qazaqstanda Volonter jyly bolyp jarııalanyp, sol jyldan bastap salalyq volonterlikti damytý maqsatynda volonterlik uıymdarǵa memlekettik áleýmettik tapsyrys, granttyq qarjylandyrý aıasynda konkýrstyq negizde áleýmettik jobalarǵa qarjy bóline bastady. Atalǵan granttyq jobalar aıasynda 2024-2026 jyldarǵan arnalǵan «Taza Qazaqstan» aktsııasy aýqymynda ekologııalyq volonterlikti damytý» jobasy júzege asyrylyp jatyr. Onyń aıasynda eko-volonterlerdi oqytý, sanyn arttyrý, túrli formattaǵy eko-aktsııalar uıymdastyrý jumystarymen qatar, eko-volonterlerge arnalǵan kishi granttar (1 mln teńgeden 10 kishi grant) berý qamtylǵan, dedi mınıstrlikten agenttiktiń resmı saýalyna oraı.
Vedomstvo málimetinshe, Ekologııa jáne tabıǵı resýrstar mınıstrligi elimizde kásibı ekovolonterlerdi daıarlaý, ár óńirde turaqty jumys atqaratyn ekovolonterlerdi qoldaý maqsatynda jumys istep jatyr. Sonymen qatar ıÝNISEF sarapshylarymen jáne Ulttyq volonterlik jeliniń qatysýymen «Taza Qazaqstan» bastamasyn ilgeriletýge baǵyttalǵan ekologııalyq volonterlikti damytý baǵdarlamasyn ázirleýde. Atalǵan baǵdarlama jyl ishinde qabyldanady.
- Osy jyldyń 22–24 sáýir kúnderi Astana qalasynda ótetin joǵary deńgeıdegi Óńirlik ekologııalyq sammıt aıasynda 23 sáýir kúni «Volonterlik jáne ekologııalyq is-qımyldar» paneldik sessııasy ótedi. Oǵan Qazaqstan, Ázerbaıjan, Qyrǵyzstan, Tájikstan, Túrikmenstan jáne Ózbekstan elderiniń volonterleri qatysady. Sondaı-aq, jyl ishinde Qaraǵandy oblysynda «Balkhash Tour Fest» halyqaralyq eko-volonterler forýmy, Semeı qalasynda «Healthy Future Forum» salaýatty bolashaq forýmy, Mańǵystaý oblysynda Caspian Sea Action Week 2026 Kaspıı teńizindegi is-qımyl aptalyǵy, Qyzylorda oblysynda Green Aral: Volunteers for Life - Aral óńiriniń tabıǵatyn qalpyna keltirýdiń halyqaralyq volonterlik aptalyǵy jáne Almaty qalasynda «Ecothon» halyqaralyq ekologııalyq hakatony ótedi. – dedi mınıstrlikten.
Aıta keteıik, jyl basynda ótken Volonterler forýmynda Prezıdent Qasym-Jomart Toqaev Úkimetke eriktiler isin damytý boıynsha 2030 jylǵa deıingi kezeńdi qamtıtyn jańa mazmundy qujat ázirleýdi tapsyrǵan edi.
