Bıyl egilgen kúnbaǵys alqaby rekordtyq kórsetkishke jetti

ASTANA. KAZINFORM — Prezıdenttiń aýyl sharýashylyǵynyń jalpy ónim kólemin eki eseleý jónindegi tapsyrmasyn oryndaýǵa arnalǵan Jol kartasy aıasynda Aýyl sharýashylyǵy mınıstrligi egis alqaptaryn ártaraptandyrý sharalaryn kúsheıtip jatyr. Bul týraly vedomstvonyń baspasóz qyzmeti málim etti.

2025 jyly elimizdegi jalpy egis kólemi 322,8 myń ga-ǵa artyp, 23,6 mln ga-ǵa jetti (2024 jyly – 23,3 mln ga).

Sonyń ishinde dándi jáne dándi-burshaqty daqyldar alqaby 630 myń ga-ǵa azaıyp, 16 mln ga-ny qurady, al bıdaı egistigi 884,6 myń ga-ǵa qysqaryp, 12,3 mln ga boldy.

Bosatylǵan jerler anaǵurlym tabysty daqyldarǵa berildi. Kúnbaǵys rekordtyq 1,8 mln ga aýmaqta egildi – bul ótken jylmen salystyrǵanda 481,5 myń ga artyq.

Kartop egistigi de ósim kórsetip otyr: kólemi 9,3 myń ga-ǵa artyp, 131,2 myń ga-ǵa jetti. Onyń ishinde uıymdasqan sharýashylyqtardaǵy ósim 12,5 myń ga qurap, 84,5 myń ga-ǵa jetti. Sonymen qatar sýarmaly daqyldar alqaby azaıtylyp otyr.

 2025 jyly maqta 144,5 myń ga jerge egildi, onyń ishinde 50 myń ga tamshylatyp sýarýmen qamtylǵan. Qyzylorda oblysynda kúrish alqaby 85,6 myń ga-dan 80,9 myń ga-ǵa deıin qysqardy.

Egisti ártaraptandyrý ishki azyq-túlik balansyn nyǵaıtýǵa, jekelegen daqyldarǵa táýeldilikti azaıtýǵa, agroónerkásiptik keshenniń turaqtylyǵyn jáne fermerlerdiń tabysyn arttyrýǵa múmkindik beredi. Al jer resýrstaryn neǵurlym utymdy paıdalaný eldiń azyq-túlik qaýipsizdiginiń negizine aınalýǵa tıis.

Buǵan deıin habarlanǵandaı, elde ósimdik maıyn óndirý 24%-ǵa ósti.