Bıyl «E-Joldar» aqparattyq júıesi iske qosylady
ASTANA. KAZINFORM – Bıyl jol qurylysyn onlaın baqylaýǵa múmkindik beretin «E-Joldar» aqparattyq júıesi iske qosylady. Bul týraly Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
— Avtomobıl joldaryn salý jáne jóndeý jobalaryn iske asyrý barysyn ashyq ári jedel baqylaý maqsatynda «E-Joldar» aqparattyq júıesi ázirlenýde. Júıede «Qoǵamdyq baqylaý» jáne «Jóndeý» modýlderi engizilip jatyr. Olar onlaın rejımde jumystardyń oryndalý barysyn qadaǵalaýǵa, merdiger uıymdar týraly málimet alýǵa, atqarýshylyq qujattamany júkteýge jáne ár joba boıynsha negizgi aqparatqa ashyq qol jetkizýge múmkindik beredi. «Qoǵamdyq baqylaý» fýnktsıonaly jol paıdalanýshylardyń ótinishterin jedel qaraýdy qamtamasyz etedi. Júıeni paıdalanýǵa engizý 2026 jylǵa josparlanǵan, — dedi Úkimet basshysy.
Premer-mınıstr jol qurylysy merzimderi men sapa talaptaryn buzǵany úshin qandaı sanktsııalar qoldanylatynyn da atap ótti.
— Jumystardyń merzimderi men sapa talaptaryn buzǵany úshin jaýapkershilik memlekettik satyp alý týraly zańnamada aıqyndalǵan jáne belgilengen tártippen qoldanylady. Kelisimsharttyq mindettemeler oryndalmaǵan nemese tıisinshe oryndalmaǵan jaǵdaıda merdiger uıymdar sot tártibimen josyqsyz jetkizýshiler tizilimine engiziledi, — dedi ol.
Aıta keteıik, Májilis depýtaty Janarbek Áshimjan Premer-mınıstr Oljas Bektenovke saýal joldap, ótken jyly jol jamylǵysyn tıisti deńgeıde jóndep ustamaǵany úshin 7,4 myń laýazymdy jáne zańdy tulǵa jaýapkershilikke tartylǵanyna nazar aýdartqan edi.