Bıyl Desanttyq-shabýyldaý áskerlerinde 150 paramedık daıyndalady

ASTANA. KAZINFORM — Qazaqstan Qarýly kúshteriniń Desanttyq-shabýyldaý áskerlerinde 2026 jyly 150 áskerı qyzmetshi-paramedık daıyndaý josparlanyp otyr. 

Oqý protsesi urys jaǵdaıyna barynsha jaqyn ortada alǵashqy jáne jedel medıtsınalyq kómek kórsetý daǵdylaryn meńgerýge baǵyttalǵan.

Almaty qalasynda ótken kezekti oqý-jattyǵý jıyndary aıasynda Almaty, Qonaev jáne Jetisý garnızondarynan kelgen 35 áskerı qyzmetshi Qorǵanys mınıstrligi Áskerı medıtsına ortalyǵy nusqaýshylarynyń jetekshiligimen bir aptalyq kýrstan ótti.

- Oqý baǵdarlamasy taktıkalyq medıtsına boıynsha teorııalyq jáne praktıkalyq sabaqtardy qamtydy. Áskerı qyzmetshiler jaralanǵan adamnyń jaǵdaıyn baǵalaý tártibin, qan ketýdi toqtatý tásilderin, postgemorragııalyq shok kezindegi is-qımyldy, tynys alý joldarynyń ótkizgishtigin qalpyna keltirýdi jáne júrek-ókpe reanımatsııasynyń negizgi ádisterin meńgerdi.

Tájirıbelik sabaqtar arnaıy jabdyqtalǵan jattyǵý oryndarynda uıymdastyryldy. Qatysýshylar medıtsınalyq quraldardy paıdalana otyryp, ózine jáne ózgege kómek kórsetý tásilderin pysyqtady. Oqý qorytyndysy boıynsha áskerı qyzmetshiler emtıhan tapsyryp, sertıfıkattar aldy, - delingen mınıstrlik aqparatynda.

Desanttyq-shabýyldaý áskerleri qolbasshysy basqarmasynyń medıtsına qyzmetiniń bastyǵy, medıtsına qyzmetiniń podpolkovnıgi Ilzat Mýsaev jaraqat alǵan kezde bolatyn ólim-jitimniń basym bóligi alǵashqy on mınýtta oryn alatynyn atap ótti. Onyń aıtýynsha, osy kezeńde janynda daıyndalǵan paramedıktiń bolýy sheshýshi mánge ıe.

Áskerı paramedıkterdi daıarlaý — Desanttyq-shabýyldaý áskerleriniń medıtsınalyq qamtamasyz etý júıesindegi negizgi baǵyttardyń biri. Bul jumys jeke quramnyń ómiri men densaýlyǵyn saqtaýǵa baǵyttalǵan. 2023 jyldan beri atalǵan ásker túrinde 300-den astam paramedık daıyndaldy.

Aıta keteıik, Áýe qorǵanysy kúshteri byltyr 12 myń saǵattan astam oqý-jattyǵý ushýlaryn oryndaǵan.