Bıyl dańqty batyrlar atyndaǵy ordenderdi sarbazdarǵa tabystaý kerek – Edil Jańbyrshın
ASTANA. KAZINFORM – Búgin Májilistiń jalpy otyrysynda depýtat Edil Jańbyrshın Ekinshi dúnıejúzilik soǵysqa qatysty ǵylymı-zertteý jumystaryn júıeli túrde júrgizýdi qaıta jańǵyrtýdy usyndy.
«Jaqynda ǵana Ulttyq quryltaıda elimizge arnalǵan keleli saıası-ıdeologııalyq, adamı qundylyqtar, azamattardyń quqyqtary týraly, áleýmettik jáne ekonomıkalyq baǵyttaǵy máseleler naqty kóterildi. Memleket basshysy bárimiz kóterip júrgen úlkendi-kishili ózekti oılardy naqtylap, olardy iske asyrý baǵyttaryna toqtaldy. Quryltaıda óz tarapymnan surapyl soǵysta qasyq qany qalǵansha erlik kórsetken maıdangerlerimizdiń „Adal adam“ qaǵıdatyna saı tarıhı turǵydan ádil baǵalanýy tıis ekenin kóterdim. Óıtkeni, álemdegi barsha ulttardy joıyp, ózderiniń natsıstik ıdeologııasyn ornatqysy kelgen fashısterge atalarymyz qasqaıyp qarsy turdy. Biraq, búgin tek beıbit qoǵamda ómir súrip, oq-dáriniń ıisin sezbegen, Otan úshin kúrestegi shaıqastarmen tereń tanyspaǵan urpaǵymyzdyń keıbir ókilderi tarıhı oqıǵalarymyz ben aıbyndy tulǵalarymyzdy joqqa shyǵarǵysy keledi. Bul — tarıhymyzǵa jasalǵan qııanat, batyrlardyń rýhyna degen qurmetsizdik», — dedi E. Jańbyrshın Úkimet basshysynyń orynbasary Tamara Dúısenovanyń atyna joldaǵan saýalynda.
Onyń paıymynsha, árbir tarıhı oqıǵany, sol oqıǵalardyń bel ortasynda júrgen tulǵalardyń esimin jas urpaqtyń jadynda tasqa qashaǵandaı etip tańbalaý kerek.
«Máselen, álemniń kóptegen elderi óz tarıhyn tuǵyrly tulǵalarmen tyǵyz baılanystyrady, tipti olardyń esimderimen arnaıy dáýirlerdi men kezeńderdi ataıdy. Oǵan qosa, memleketteriniń ordenderi men medaldaryna uly kósemderiniń, dańqty qolbasshylarynyń esimderin bergen. Bul ulttyń ulylyǵyn jáne saıası mádenıetiniń bıiktigin bildiredi. Osy rette, keshegi Ulttyq quryltaıda Qasym-Jomart Toqaev tarıhı ádildikti ornatý úshin elimizdegi aty ańyzǵa aınalǵan qaharmandarymyz — Baýyrjan Momyshuly, Raqymjan Qoshqarbaev, Saǵadat Nurmaǵambetovtyń esimderimen atalatyn arnaıy ordenderdi taǵaıyndaýdy usyndy. Prezıdenttiń bul usynysy — adamzat órkenıetinde zardaby jóninen buryn-sońdy bolmaǵan, mıllıondaǵan adamnyń ómirin jalmaǵan, taǵdyrlaryn talqan etken, Ekinshi Dúnıejúzilik soǵysta ot keshken 1,4 mln qazaqstandyq maıdangerdiń rýhyna degen naǵyz qurmet. Bul otanshyldyqty, ulttyq biregeılikti nyǵaıtýǵa zor yqpal etedi. Biraq batyr babalarymyzdyń rýhyna kórsetilgen Quryltaıdaǵy ıgi bastama aqparattyq turǵydan jan-jaqty taratylmaı, qoǵamda laıyq deńgeıde nasıhattalmady. Sondyqtan, birinshi kezekte, biz Májilis depýtattary osy tyń ıdeıaǵa arnaıy toqtalýdy jón kórdik jáne atalǵan usynysty zańdy túrde bekitýimiz qajet. Bul sheshimdi tez arada aldaǵy mańyzdy merekelerge deıin qabyldap, alǵashqy sarbazdarymyzdy elimizdiń birtýar perzentteriniń atyndaǵy mártebeli ordendermen marapattaýymyz kerek. Búgingi bizdiń depýtattyq saýalymyz — Quryltaıda kóterilgen máselelerdi Parlament minberinen Úkimetke resmı túrde joldaý», — dedi depýtat.
Bul turǵyda E. Jańbyrshın tıisti usynystardy jarııalady.
«Birinshiden, Úkimet qazirden bastap maıdangerlerimizdiń atyn máńgi este saqtaý sharalaryn qolǵa alsyn. Ekinshiden, Ekinshi Dúnıejúzilik soǵysqa qatysty ǵylymı-zertteý jumystaryn júıeli túrde júrgizýdi qaıta jańǵyrtyp, maıdangerlerdiń derekteri tsıfrlandyrylǵan arnaıy Ulttyq portaldy jasaý qajet. Úshinshiden, bul jumystarǵa kóp jyldyq tájirıbesi bar qoǵamdyq uıymdardy tartyp, atalǵan jobalarǵa barlyq kózderden qarjylandyrý qarastyrylýy tıis», — dedi depýtat.
Eske salsaq, jaqynda Prezıdent Qasym-Jomart Toqaev «Aıbyn» ordeniniń túrli dárejesin dańqty batyrlardyń atymen ataýdy usynǵan edi.
