Bıyl da qurǵaqshylyq bolýy múmkin, sý mınıstrligi oıdaǵydaı nátıje bermedi – Prezıdent
ASTANA. KAZINFORM – Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysynda qurǵaqshylyq pen sý tapshylyǵy máselesin kóterip, sý únemdeý tehnologııasyn keń aýqymda engizýdi tapsyrdy.
«Byltyr Jambyl oblysynyń dıqandary sý tapshylyǵynan qatty zardap shekti. Bıyl da qurǵaqshylyq bolýy múmkin. Arnaıy qurylǵan Sý resýrstary jáne ırrıgatsııa mınıstrliginiń jumysy ázirge oıdaǵydaı nátıje bergen joq. Al, kórshi memleketter sý tapshylyǵyn joıý úshin naqty maqsat qoıyp, belsendi jumys istep jatyr. Al bizde sý resýrstaryn basqarý júıesin damytý tujyrymdamasy jaqynda ǵana qabyldandy. Bul qujat tym uzaq talqylandy», - dedi Prezıdent.
Memleket basshysy jaǵdaıdyń óte kúrdeli ekenin ashyq aıtty.
«Mysaly, elimizdegi sýarmaly jerdiń 13 paıyzynda ǵana sý únemdeý tehnologııasy bar. Ásirese, Túrkistan jáne Qyzylorda oblystaryndaǵy jaǵdaı múshkil, qurǵaqshylyq qaýpi asa joǵary. Soǵan qaramastan, osy aımaqtarda tıisti jumys júrgizilip jatqan joq. Sondyqtan, sýdy kóp qajet etetin daqyldardy azaıtyp, qurǵaqshylyqqa tózimdi daqyldardy kóbeıtý kerek, sý únemdeıtin tehnologııany engizý qajet. Ahýaldy jaqsartý úshin batyl áreket jasaý kerek», - dedi Q. Toqaev.
Prezıdenttiń pikirinshe, eń aldymen, sý únemdeý tehnologııasyn keń aýqymda engizgen jón.
«Shyny kerek, biz sýdy tym orynsyz jumsaımyz. «Sýdyń da suraýy bar». Búkil el bolyp sýdy únemdep paıdalaný mádenıetin qalyptastyrýymyz kerek. Kórshi memleketterdiń tájirıbesin zerttep, tıimdi tustaryn alý qajet. Eldi sýmen qamtamasyz etý – asa mańyzdy mindet, ulttyq qaýipsizdik máselesi deýge bolady. Ónerkásipte, agrosektorda, kommýnaldyq sharýashylyqta, jalpy, barlyq salada sýdy tıimdi paıdalaný máselesine erekshe mán berý qajet», - dedi ol.
