Bıyl bıýdjettiń kirisine qandaı táýekelder áser etýi múmkin

ASTANA. KAZINFORM — Bıyl qańtar-mamyr aılarynda bıýdjettiń kiris jospary 100,5 paıyzǵa oryndaldy. Bul týraly Premer-mınıstrdiń orynbasary — ulttyq ekonomıka mınıstri Serik Jumanǵarın málim etti.

Búgin Senattyń jalpy otyrysynda depýtat Serik Shaıdarov osy jyly respýblıkalyq bıýdjettiń kiris bóliginiń oryndalýyna qatysty suraq qoıdy.

— Kiris josparynyń oryndalmaýyna qandaı táýekelder bar?, — dep surady senator.

Premer-mınıstrdiń orynbasary — ulttyq ekonomıka mınıstri munaı baǵasyna qatysty ózgerister bolǵanyn eske saldy.

— Byltyrǵy bıýdjetti josparlap, kórsetkishterge boljam jasalǵanda, basty derekter — Brent markaly munaı baǵasy 75 AQSh dollaryn, al ulttyq valıýta baǵamy dollarǵa shaqqanda 470 teńge boldy. Al qazir bul kórsetkishterden edáýir alshaqpyz. Birinshi toqsanda munaı baǵasy 75 bolsa, ekinshi toqsannan bastap tómendedi, — dedi Serik Jumanǵarın.

Osy oraıda ol baǵanyń ózgerýi bıýdjetke áser etetinin aıtty.

— Sonymen qatar, qazir eksporttyq metall baǵasynda oń qarqyn baıqaldy. 2024 jyl men 2025 jylǵy kórsetkishti salystyrsaq, qańtar-mamyrda alıýmınıı 9 paıyzǵa, kúmis — 26,5 paıyzǵa, altyn — 38,3 paıyzǵa, myrysh — 5,8 paıyzǵa, mys 4 paıyzǵa qymbattady. Bul óte jaqsy habar, — dedi vıtse-premer.

Onyń sózine qaraǵanda, salyq jáne kedendik ákimshilendirý arqyly bıýdjetke qosymsha 400 mlrd teńge tartyldy. Bul rette, tsıfrlandyrý nátıjesinde tıimdiligi artty.

— Jalpy alǵanda, qańtar-mamyr aılarynda kiris jospary 100,5 paıyzǵa oryndaldy… Syrtqy ahýal ózgerse, bul jaǵdaı ishki faktorǵa áser etedi. Sol jaǵdaıda bıýdjettik parametrler qaıta qaralýy múmkin, — dedi Serik Jumanǵarın.

Aıta keteıik, keıingi kúnderi munaı qymbattady.