Bıyl bıýdjetten áleýmettik tólemderge 5,3 trln teńge bólindi — Úkimet
ASTANA. KAZINFORM — 2024 jylǵy mańyzdy qadamdardyń biri bazalyq jáne ortaq zeınetaqylardy, sondaı-aq memlekettik járdemaqylardy ındeksteýmen baılanysty áleýmettik tólemderdi arttyrý boldy. Bul týraly QR Úkimeti málim etti.
2024 jyly Qazaqstan Respýblıkasy Eńbek jáne halyqty áleýmettik qorǵaý mınıstrligi Memleket basshysy Qasym-Jomart Toqaev aıqyndaǵan memlekettik áleýmettik saıasattyń negizgi baǵyttaryn iske asyrý, halyqtyń ómir súrý deńgeıin jaqsartý jáne eńbek salasyndaǵy ádilettilikti qamtamasyz etý jóninde keshendi sharalar qabyldaı otyryp, jumysty jalǵastyrdy.
Sonyń sheńberinde áleýmettik qorǵaý, jumyspen qamtý, eńbek quqyǵyn qorǵaý jáne múgedektigi bar adamdar úshin áleýmettik ınklıýzııany qamtamasyz etý baǵytynda mańyzdy qadamdar jasaldy. Mınıstrliktiń bıylǵy qyzmeti tsıfrlandyrýǵa jáne barlyq protsestiń ashyqtyǵyn arttyrýǵa baǵyttalǵanyn atap ótken jón, bul halyq úshin áleýmettik qyzmetterdiń qoljetimdiligi men tıimdiligin arttyrýǵa múmkindik berdi.
Áleýmettik tólemder men zeınetaqy jınaqtaryn arttyrý
Bıyl ınflıatsııanyń boljamdy deńgeıin eskere otyryp, tólem mólsheri ulǵaıtyldy.
Memleket basshysynyń tapsyrmasy boıynsha 2023 jyldan bastap bes jyl ishinde eń tómengi bazalyq zeınetaqyny eń tómengi kúnkóris deńgeıiniń 70%-na deıin, eń joǵarǵysy — 120%-ǵa deıin jyl saıyn kezeń-kezeńimen arttyrý júzege asyrylady. Máselen, 2024 jylǵy 1 qańtardan bastap bazalyq zeınetaqynyń eń tómengi mólsheri eń tómengi kúnkóris deńgeıinen 60%-dan 65%-ǵa deıin ósti, bul 28 215 teńgeni quraıdy, eń joǵary mólsheri — eń tómengi kúnkóris deńgeıinen 100%-dan 105%-ǵa deıin, bul 45 578 teńgeni quraıdy.
Eńbek jáne halyqty áleýmettik qorǵaý mınıstrligi de óskeleń urpaqtyń bolashaq zeınetaqylary deńgeıin arttyrý baǵdarlamasyn júzege asyrýdy jalǵastyrdy. 2024 jylǵy 1 qańtardan bastap jumys berýshilerdiń mindetti zeınetaqy jarnalaryn kezeń-kezeńimen iske asyrý bastaldy, olar jumys isteıtin 4,3 mln-nan astam azamattyń shotyna aýdaryldy.
2024 jyly zııandy eńbek jaǵdaıynda uzaq ýaqyt jumys isteıtin azamattardy áleýmettik qoldaýǵa erekshe nazar aýdaryldy. Jańa arnaıy áleýmettik tólem engizilip, ol 2024 jyldyń 1 qańtarynan bastap 13 myń adamǵa taǵaıyndaldy.
Jalpy, 2024 jyly respýblıkalyq bıýdjetten áleýmettik tólemderge 5,3 trln teńge baǵyttaldy, bul elimizdiń bıýdjet shyǵystary jalpy kóleminiń 22%-yn qurady. Bul qarajat zeınetaqy men járdemaqy alatyn 4,5 mln azamatqa, onyń ishinde 2,4 mln zeınetker men 2,1 mln túrli áleýmettik tólem alýshylarǵa bólindi. Nátıjesinde, memlekettiń barlyq áleýmettik mindettemesi merziminde ári tolyq kólemde oryndaldy.