Bıyl Buqaralyq aqparat quraldary qyzmetkerleri kúni keń kólemde atalyp ótýde - Smadııarov
QR Prezıdentiniń keńesshisi – Baspasóz hatshysy Aıbek Smadııarov BAQ qyzmetkerlerin kásibı merekesimen quttyqtady.
- Qadirli áriptester!
Barshańyzdy kásibı merekelerińizben shyn júrekten quttyqtaımyn!
Bıyl Buqaralyq aqparat quraldary qyzmetkerleri kúni keń kólemde atalyp ótýde. Osy salanyń damýyna eleýli úles qosqan ardagerlerimiz, jýrnalıster qaýymy aıryqsha ardaqtaldy. Olardyń birqatary joǵary memlekettik marapattarǵa, bedeldi syılyqtar men granttarǵa ıe boldy.
Jýrnalıstıka salasynda eńbek etip júrgen bir top qyzmetkerge kásibı mereke aıasynda jyldaǵy dástúrge saı Memleket basshysy Qasym-Jomart Toqaevtyń atynan páter berildi.
Prezıdent BAQ qyzmetkerleri kúnine oraı Aqordada ótken saltanatty jıynda: «Sapaly habar taratyp, qajyrly qyzmet etip júrgen aımaq tilshileriniń eńbegin eleýsiz qaldyrýǵa bolmaıdy. Sondyqtan meniń tapsyrmammen osy jyly alǵash ret oblystarda jumys isteıtin jýrnalısterge de páter kilti tabystalady», – degen edi.
Osyǵan saı, bıyl Memleket basshysy atynan «Dara» Prezıdenttik bastamalar qory arqyly BAQ qyzmetkerlerine 66 páter berildi. Onyń ishinde Astana qalasynda – 15, Almaty qalasynda – 15, qalǵan 18 aımaqta 2 páterden bólinip otyr.
Baspana alǵandar qatarynda respýblıkalyq BAQ ókilderi ǵana emes, jergilikti gazet, telearna, aqparattyq portaldar tilshileri de bar. Tipti ortalyqtan shalǵaı eldi mekender de nazardan tys qalǵan joq. Mysaly, bul joly Qostanaı oblysynyń Arqalyq qalasynda jáne Túrkistan oblysynyń Sozaq aýdanynda turatyn áriptesterimiz úıli boldy.
Igi joba jýrnalıstıka salasyndaǵy bilikti mamandardyń óńirde turaqtaýyna septigin tıgizeri anyq. Bul óz kezeginde aımaqtyq BAQ-tyń zamanǵa saı damýyna yqpal etedi.
Merekelerińiz qutty bolsyn! - dep jazdy Aıbek Smadııarov jelidegi arnasynda.
Aıta keteıik, jýrnalısterge Prezıdenttiń BAQ salasyndaǵy syılyǵy tabystaldy.
