Bıyl birqatar áýejaıda ushý qaýipsizdigin jetildirý jumystary iske asady
ASTANA. KAZINFORM – QR Kólik mınıstrligi osy jyly óńirlerdegi áýejaılardy damytý baǵytyndaǵy jumystarǵa túsinik berdi.
- Prezıdenttiń 2024 jylǵy Joldaýynda bergen tapsyrmasyna sáıkes ishki týrızmdi jáne jolaýshylar áýe tasymalyn damytý úshin bıyl Zaısan, Katonqaraǵaı jáne Kendirli kýrorttyq aımaqtarynda jańa úsh áýejaıdyń qurylysy bastalady. Bul jobalardyń iske asyrylýy óńirlerdegi ekonomıkanyń damýyna jańa qarqyn beredi, sondaı-aq otandyq ári sheteldik týrıster aǵynyn arttyrýǵa, jergilikti turǵyndardy qosymsha jumys oryndarymen qamtamasyz etýge septigin tıgizedi. Sonymen qatar, elimizdiń birqatar áýejaıynda ushý qaýipsizdiginiń jaı-kúıin jaqsartýǵa baǵyttalǵan áýejaılardyń jerústi ınfraqurylymy obektilerin jańǵyrtý boıynsha jumystar josparly túrde atqarylyp jatyr, - delingen mınıstrliktiń Kazinform agenttigine bergen jaýabynda.
Máselen, Aqtaý qalasynyń áýejaıynda 2025 jyldyń kókteminde ushý-qoný jolaǵyn, taksı joldary men perrondardy kúrdeli jóndeýdi jalǵastyrý josparlanǵan.
- Pavlodar qalasynyń áýejaıynda ushý-qoný jolaǵyn, taksı joldaryn qaıta jańartý josparlanǵan. Sondaı-aq, bıyl Balqash qalasynyń áýejaıynda aerovokzal ǵımaratyn qaıta jańartý qarastyrylǵan. Bul jumystar áýe saparynyń qaýipsizdigi men júıeliligin qamtamasyz etýge, sondaı-aq IKAO halyqaralyq standarttaryna sáıkes keltirýge baǵyttalǵan, - dep atalyp ótken vedomstvo aqparatynda.
Eske sala keteıik, buǵan deıin Kólik mınıstrligi 3 jańa áýejaıdyń jobalaý qujattaryn ázirleýge kiriskenin jazǵan bolatynbyz.