Bıyl Biryńǵaı qarjy ombýdsmeni keńsesi jumysyn bastaıdy - Mádına Ábilqasymova
ASTANA. KAZINFORM – Prezıdent Qarjy naryǵyn retteý jáne damytý agenttiginiń tóraǵasy Mádına Ábilqasymovany qabyldady, dep habarlaıdy Aqorda.
Memleket basshysy qarjy naryǵyn retteý men damytýdyń bıylǵy 8 aıdaǵy nátıjeleri jáne aldaǵy kezeńge arnalǵan mindetter týraly esepti tyńdady.
Mádına Ábilqasymova bankter týraly jańa zańdy iske asyrý aıasynda zańǵa táýeldi aktiler bazasy tolyǵymen jańarǵany, 80 normatıvtik-quqyqtyq akti qabyldanǵany jóninde baıandady.
Bankterdiń aktıvteri 75,6 trıllıon teńgege deıin (6,9 paıyzǵa) ulǵaıǵan, kapıtaldyń jetkiliktiligi 20,7 paıyzdy quraıdy.
Agenttik qadaǵalaý qyzmeti sheńberinde 8 aıda qarjy sektory sýbektilerine 279 ınspektorlyq tekserý júrgizgen. 190 qadaǵalaý sharasy qoldanylyp, 465 mıllıon teńge somasynda aıyppul salynǵan.
Mıkroqarjylandyrý jáne kollektorlyq agenttikter naryǵynda jumys isteıtin 13 sýbekti lıtsenzııasynan aıyryldy, al altaýynyń lıtsenzııasy ýaqytsha toqtatylyp, 4 kollektorlyq agenttik tizilimnen shyǵaryldy.
Halyqtyń shamadan tys kredıt alýyn azaıtý jáne ekonomıkany qarjylandyrýdy keńeıtý sharalary jóninde málimet berdi.
Bızneske arnalǵan kredıtter 3,5 paıyzǵa ulǵaıyp, 16 trıllıon teńgege jetti. Kásipkerlikke jańadan berilgen kredıt kólemi jyl basynan beri 19,1 paıyzǵa ósip, 12,5 trıllıon teńgeni qurady.
Retteý sharalarynyń nátıjesinde 7 aı ishinde tutynýshylyq nesıeniń ósimi 4,6 paıyzǵa deıin baıaýlady.
Bıyl shilde aıynan bastap merzimi keshiktirilgen bereshekti ujymdyq retteýdiń Finkelisimkz platformasy iske qosyldy.
Jyl sońyna deıin azamattardyń aryz-shaǵymdaryn qaraý úshin Biryńǵaı qarjy ombýdsmeni keńsesi jumys isteı bastaıdy.
Memleket basshysyna Kapıtal naryǵy men saqtandyrý naryǵyn damytýdyń 2030 jylǵa deıingi baǵdarlamasyn, sondaı-aq «Kapıtal naryǵy týraly» jáne «Saqtandyrý naryǵy týraly» jańa zań jobalaryn ázirleý jónindegi tapsyrmalarynyń oryndalý barysy jaıynda esep berdi.
Qarjy sektoryn tsıfrlandyrý jáne oǵan jasandy ıntellektini engizý týraly aqparat usyndy.
Agenttik jasandy ıntellekt tehnologııasyna negizdelgen FinAI biryńǵaı qadaǵalaý platformasyn qurǵan. Jyl sońyna deıin Qarjy naryǵyna jasandy ıntellektini engizý strategııasy ázirlenedi. Qujatta aqparattyq qaýipsizdik pen derekterdi qorǵaýdyń biryńǵaı tásilderi qarastyrylady.
Memleket basshysy qarjylyq turaqtylyqty qamtamasyz etý, qarjy salasynda jasandy ıntellektini keńinen paıdalaný, ekonomıkanyń naqty sektorlaryn kredıtteýdi arttyrý, sondaı-aq kapıtal men saqtandyrý naryǵyn odan ári damytý jóninde birqatar tapsyrma berdi.
Aıta keteıik, Prezıdent Emomalı Rahmondy Tájikstan táýelsizdiginiń 35 jyldyǵymen quttyqtady.
